Shillong, Jymmang 28
U nongïalam ka Liang Pyrshah ha District Council, uba dei u MDC ka United Democratic Party (UDP) na Sohra Constituency, kata u Bah Titosstarwell Chyne ha ka sngi Palei jong ka taïew u la ong ba un ap shuwa ban ïoh ïa ki jingtip kiba bniah hashuwa ba un pynpaw ïa ka nongrim ka jong u bad pynpaw pat, ba u Syiem uba la shah jied um dei ban shu shah weng jyndat khlem da ïaid da ka rukom kaba dei.
Ïa kane u Bah Titos u la kren sha ki lad pathai khubor, halor ka jingleh ka VPP, kaba synshar ïa ka KHADC, halor ka jingsospon ïa u Syiem ka Hima Mylliem, kata u Ainam Manik Syiem.
“Na ka liang jong nga, nga sngew ba ngam pat dei ban kren eiei ïa ka kam kaba la leh da ka Executive Committee (EC) ka KHADC. Lada ki sngew ba ka long kaba dei ban weng ïano-ïano, te ngan ong shuh kumno” ong u Bah Titos.
U Bah Titosstarwell Chyne u la ong ba ym pat ïohi ïa ka nongrim jong ka hukum kaba la pynmih da ka EC.
“Haduh mynta ngam tip hi ruh ïa ka daw, balei ki la weng noh ïa u. Ngam pat leit sha ophis, namar ba ngam shym la don shane” u la ong.
“Ngam tip ïa ki daw, hynrei shisien ba nga la ïoh jingtip ïa ki daw, ngin sa ïakren namar ba wat ka dorbar jong ka Council ruh kadei kaba la jan long” u la bynrap.
Shuh shuh u la ong ba ïa katei ka mat yn rah hapoh jong ka Ïingdorbar. “Ngin sa ïa peit ha ka por ba don ka dorbar, ïa kaei kaba ngin ïakren bad ban buh ïa ki jingkylli”.
Haba banjur ïa ka rukom treikam ka Council katkum ka riti synshar u Bah Titos Chyne u la ong, “Ka jingthmu jong ki District Council ka long ban ïada bad pynneh pynsah. Ka District Council kadei tang ka nongïada bad ban pynneh pynsah ïa ka riti dustur tynrai, ka jingpynïaid ïa ki shnong ki thaw, ki Kur, ki Hima jong ngi, kumba la pynkup bor da ka khyrnit kaba hynriew ïa kaba la ai ha ngi”.
“Katkum ka jingsngewthuh ka jong nga, kadei ka kamram jong ka District Council, ban pynneh pynsah. Hynrei ha ka jingïaid ka por, ki ju mih ki jingthud jingwit, ki kynrum kynram hapoh jong ka Hima bad kitei ki kynrum kynram ki wan na ki Hima, ym na ka District Council” u la ong.
Kaei kaba ka Council kadei ban leh, u Bah Titos u ong, ba ka don ka rukom treikam kaba la don lypa. “Ka nongrim jong nga ka long ba ha kano-kano ka Hima kaba don ïa ki kynrum kynram, lada u Syiem u leh donbor marwei ïa ki paidbah, um sngap ïa ki Myntri, ka don ka rukom treikam, kaba ka District Council ka lah ban shimkhia ïa katei ka kam, lada ïoh ïa ka jingujor. Ka don ka jingkhot ban bishar bniah, ka jingai ïa ka Show Cause bad kumta ter-ter”.
“Ki don ki bynta jong ka rukom pynïaid ïa ki kam ki jam” u la banjur “Hynrei kam shym la don pat kano kano ka por ba ka District Council kan shu weng beit mardor ïano ïano ruh, ïa u Syiem uba la shah jied lyngba ka jingpynlong ïa ka ilekshon”.
