Shillong, Jymmang 28
U Bah V.G Kharngap-kynta, kyrtong ka United Democratic Party (UDP) sha ka ilekshon MP shiteng samoi ha Lok Sabha na Shillong Kon-stitwensi, uba dei ruh u nongïasaid aiñ ba rangbah ka Jylla, u la pynpaw ka jingsngewkmen hadien ba ka UDP ka la jied bad ibit ïa u ban long u kyrtong ha kane ka ilekshon.
U Bah V.G Khar-ngapkynta haba kren ha ka sngi pynbna ïa ka kyrteng jong u kum u kyrtong, u la khmih lynti ba ka UDP kan sa jop ha kane ka ilekshon bad kan sa ïoh ïa ka lad ban synshar ha u snem 2028.
U Bah V.G Kharng-apkynta u la ong, ba ha ka por ba u long u nongïasaid aiñ ha District Council, la bun snem ruh, ki la bun ki seng saiñpyrthei kiba ïalam ïa ka EC, hynrei kim shym la peit shiliang khmat ïa u, namar ba ki tip ba u dei u briew uba beit.
U la ong ruh ba ha Ïingkashari u long uba tbit bha ban ïasaid mukotduma bad kiba ngat pyrshah ban ïakhun bad u ki shait ïam. “Nga ju sngew synei ïa ki haba nga bam ka mluh jongno-jongno, phin ym shem ba ngan leh lyndet. Ngam dei u briew ba bam ar maloi,” u la ong.
Shuh shuh u la ong, “Mynta nga la don 38-40 snem kum u nongïasaid aiñ bad nga jan poi ka por ban shongthait noh hynrei kane ka jingïakhun ïa ka ilekshon MP shiteng samoi, kadei ka jingplie lad plie lynti jong U Blei, ba ngan ïasaid na ka bynta ka ri bad ka jaitbynriew”.
Namarkata, u Bah VG Kharngapkynta u la kyntu ïa ki MLA, MDC jong ka party, haba ki leit ban ïalap sha ki shnong ki thaw kim dei ban ong ba un jop ma u ha kane ka ilekshon, kidei ban kheiñ ba kan jop ka party bad mynta ka por ka la dei ban kamai spah kamai phew na ka bynta ka jaitbynriew.
“Ngam dei ban ïasaid aiñ tang ha Ïingkashari hynrei mynta ka la mih sa kawei ka lynti ïaid jong nga, kata ka long, ba nga hap ban ïasaid sa ha Ïingdorbar Thawaiñ ka Ri,” la ong u Bah V.G Kharngapkynta.
“Lada nga long MP, ngan hap ban pynïadei bad kiwei ki MP na kiwei ki thaiñ, namar lada donkam ïa kano-kano ka thong, ngam lah ban leh shimet, hynrei donkam ban ïatreilang bad kiwei de,” la bynrap u Bah V.G Kharngapkynta.
Ha kajuh ka por, u la ban jur ruh ba lada u long kum u MP, un hap ban pynskhem ïa ka 6th Schedule bad un trei shitom na bynta ka District Council ban pynskhem ban pynneh ïa ka riti dustur ka ri bad ka jaitbynriew.
Ha kane ka sngi la ïoh ruh ïa ka jingkren na kiwei de ki nongïalam ka UDP kiba kynthup ïa u Bah Titos Chyne, u Bah Pius Marweiñ, bad kiwei-kiwei de ki nongïalam ba hakhmat jong ka seng.
