Shillong, Jymmang 28
U Myntri Rangbah ka Jylla Conrad K Sangma ha ka sngi Balang u la ong ba ka jingkiew dor ba dang shen jong ka petrol ka dei namar ki jinglong jingman ha ka pyrthei, khamtam ka thma ba dang ïaid, haba kyntu ïa ki nongshong shnong ba kin long kiba la pynkhreh ïa kaei ka ban jia haba kyntait ba duna umphniang ha Jylla ïa mynta.
“Ka jingkiew dor ka petrol kumba phi ïatip, ka dei namar ki daw jong ka thma kaba jia bad kane ka dei kaba ktah ïa baroh kawei ka pyrthei bad kumta, ka ktah lut ïa baroh,” ong u Conrad.
“Kane kam dei kaba ktah tang ïa ka Meghalaya lane ïa ka ri India, ka dei kaba ktah ïa ka pyrthei baroh kawei bad bun ki Ri, ha ka jingshisha, kila hap ban pynïaid da ka ration da ka jingthew ïa ka jingsam ïa ka umphniang sha ki briew,” u la ong.
U Conrad u la ong ba ka Jylla kam pat poi ha kane ka khep. “Ngim pat poi ha kata ka khep bad ngam khmih lynti ba ngin poi shata hynrei, ki jingbym thikna ki don hakhmat jong ngi, kumta ngi hap ban long kiba phikir bha,” u la ong.
Haba kdew ïa ka nongrim ba ïeng ka Sorkar Pdeng, u la ong, “Nga tharai ba kaei ka khubor jong u Myntri Rangbahduh ka long, kam pat dei ka por ba ngin ïa tieng, hynrei ngi hap ban peit ïa kaei kaba ngi lah ban leh namar ka jingbym thikna kaba don”.
“Kaei kaba ngi lah ban leh kum ki briew ka long ba ngin pynkhreh ïa kaei ka ban jia bad ki jingbym thikna kiba don hakhmat jong ngi,” u la ong.
“Ka por kaba eh, ngi kyntu, hooid ïa ki nongshong shnong ruh ba ngi hap ban ïadonlang, ngi hap ban ïa ïeng lang, kine ki dei ki por ba jynjar kiba ka pyrthei kala ïakynduh,” ong u Conrad.
U la pynpaw ba ka dor jong ka umphniang ha Jylla ka dang long hapoh ka national average. “Na ka liang jong ngi kumba phi ïatip, ba ka dor ka dang long hapoh ka national average hynrei kat kaba ngi lah, ngin pyrshang ban peit ba kan ym dei ban don ka jingduna,” u la ong.
Halor ki sienjam ban tehlakam ïa ka jingpynkiew dor hi, u la ong, “Ngin pynthikna ba kan ym don ka jingbuhrieh stock ne die tuh kiba lah ban kam sha ka jingkiew ka dor hynrei hooid, kumba nga ong, kane ka dei kaba jia mynta bad ngi hap ban ïaid kumba ka long bad ngi hap pynkhreh ïa ka jingbym thikna, hynrei ngi kyrmen ba ngin lah ban ïohi ïa ki jingmih kiba bha ha ka pyrthei, watla ki long ki bym lah ban leh eiei, ngi kyrmen ba kiei kiei baroh kin sa long jai jai noh”.
Halor ka jingdawa ban pynduna ïa ka khajna ka Jylla, u Conrad u la ong ba ka dor ka Jylla kala long lypa kaba rit. “Man ki Jylla ki lah ban pynduna ïa ka khajna, ngi dei kiba rit bha haba nujor bad kiwei, hynrei kumba nga ong, ka ktah ïa ka jingïoh lum pisa ka Jylla ruh, ngi don ruh la ki jong ki jingpynlut ba ngi hap pyndap,” u la ong.
