Shillong, Jymmang 28
Ki nongïalam shnong jong ka Raid Umblai kaba don 16 Shnong bad ka Raid Mawmang kaba don 12 Shnong, kiba hap hapoh ka Hima Sohra ki la mih shakhmat ban pynshai ha kaba ïadei ka jingjied Syiem hapoh ka Hima da kaba pynpaw ba ki kyrshan ïa ka rai jong ka District Council ban pynlong da ka ilekshon.
Kine ki nongïalam ki kynthup ïa u Bah Jlen Sohtun, Rangbah Shnong Umblai bad Bah Kynmawshai Majaw, Sordar Raid Mawmang Khadarshnong Sohra Syiemship ki la ïathuh ba kim shym la soi ban jied ïa u Marremdor Syiem ban long kum u Syiem ka Hima Sohra.
Ki la ïathuh ba ha ka 3 tarik Naiwieng 2025 ki la soi tang ïa ka jingthoh kaba la buh shwa ban rung sha ka ophis Syiem ha ka sngi long Dorbar bad ka shithi ba ki ïoh ruh ka kdew ba yn pynlong ka jingpyrkhat halor ka jingïap noh u Pa’iem Freeman Sing Syiem.
U Bah Jlen Sohtun Rangbah Shnong Umblai u la ong ba u la leit sha ka Dorbar ha katei ka sngi da ka jingmut ban ïapyrkhat ïa ka jingkhlad u Syiem Freeman Sing Syiem, hynrei u khlem don bynta eiei ha kata ka jingïakren jied Syiem ba thymmai bad kam shym don ka jingthoh ha ka shithi ba la phah sha u ban kan don ka jingjied Syiem ha katei ka sngi.
U Bah Kynmawshai Majaw, Sordar Raid Mawmang ruh u la ïathuh ba ha katei ka sngi la ïakren jied Syiem, hynrei u la ïeng ban pyrshah ïa katei ka rai namar ba kam ïahap katkum ki riti dustur ka Hima Sohra. U la ïathuh ba u Marremdor ruh u la ïeng dalade da kaba ong ba um dei u Syiem ba pura, hynrei ka jinglong Syiem jong u ka dei tang ban ïoh thang ïa u Syiem ba la khlad, ha kaba na ka liang jong u, u la pyrshah halor kane bad u la mih noh na ka Dorbar.
U la ong ba ka Raid Mawmang bad ka Raid Khadhynriewshnong ki jied ïa u briew uba kynsai bad uba don burom u ban peit ban khmih ïa ka hima.
Haba ïadei ka jingkynnoh u nongïalam ka shnong Ryngud u Bah Edmund Khongsya ba ki mih na ‘restaurant’ da kaba buaid bad thoh kot thoh sla da kaba shongshit ban leit ai sha KHADC ki la pynpaw ba kim lah ban pdiang bad dawa ba u dei ban panmap hapoh shi taïew, lym kumta kin sa leit ban ujor sha ki bor jong ka aiñ.
