Nongpoh, Jymmang 28
Ha kawei ka jingjia kaba la pynpar ñiangkhriat ïa ki paidbah nongshong shnong, kawei ka heprit kaba dang 8 snem ka rta kala lait salit na ka kti ki nongrahbor hadien ba kala ïoh phet bad pyrta briew ban phah ïarap ha kawei na ki shnong kiba hap ha Ri Bhoi District.
Katkum ka tyllong khubor ba la ïoh lum, la ïathuh ba katei ka jingjia ka dei kaba la jia ha ka janmiet jong ka 27 tarik mynta u bnai katba katei ka heprit ka dang leitkai sha ïing u Ma San u jong ka uba sah ha ka shnong kaba marjan.
La ïathuh ruh ba ha kata ka por, utei u Ma San u la khot ïa ka ban leit thied doh bad phah ban shong jubor halor ka ar shaka. Ynda katei ka heprit kala kyntait, utei u Ma San u la thap ïa ka bad pynshong jubor hakhmat bad ïalam sha kawei ka jaka.
Ynda la poi ha kawei ka jaka kaba kham kynjah, la ong ba utei u Ma San u la pynsangeh ïa la ka kali ar shaka bad ha kata ka por la don ruh sa lai ngut de kiwei pat ki briew ryngkat ar tylli ki kali ar shaka, kiba katei ka heprit kam ithuh satia bad kala ïoh sngew ba ki ïakren para maki ban thep ïa ka hapoh ka byrni bad leit die ïa ka.
La ïathuh ruh ba kitei ki briew ki la sei ïa kawei ka byrni stem bad ha kata ka por hi kala ïoh lad ban phet na katei ka jaka bad pyrta briew ban ïarap. Ha kata ka por, la ïathuh ba ki don ki nongtrei pipe um kiba la ïoh sngew bad leit ban kylli pyrthew kaei kaba la jia bad ba na ka liang katei ka heprit kala phla ba ki don ki briew kiba thmu ban rahbor bad die ïa ka.
Kumta hi na ka liang kitei ki nongtrei pipe um, ki la leit ban aiti noh ïa katei ka heprit sha u Rangbah Shnong kaba ki trei, kiba la pyntip pat sha ki bahaïing hasem bad ka shnong kaba katei ka heprit ka sah.
Halor kane ka jingjia, na ka liang ki bahaïing katei ka heprit kala leit ban ujor syndon da ka ejahar ha Women Police Station, Nongpoh bad na ka liang ki bor pulit ruh kiba la shimkhia mardor, ki la ïoh ban kem noh ïa utei u Ma San katei ka heprit bad ka jingtohkit kaba bniah halor katei ka jingjia ka dang ïaid shakhmat.
