Shillong, Jymmang 28
Ka jingduk kam shym la khang lynti haba u briew u thrang ban wad ïa ka jingstad, kane ka la wan jia ha ka jingim jong u Dr. DRL Nonglait namar u dei u khun uba duk u hap leit skul bad leit bylla ban kyrshan ïa ki para.
U Dr. DRL Nonglait uba dei u kyrtong ka NPP ha kane ka ilekshon MP shiteng samoi u la phla ba u la hap ban pep skul haduh lai snem namar ba u hap ban kyrshan ïa ki para namar ka kmie bad u kpa ki long kiba duk haduh ba un da pyndep syndon ïa ka matrik.
Ïa kane u Dr. DRL Nonglait u la pynpaw haba u leit pan jingkyrshan na ki paidbah ha ïew Mawsynram kaba la long ha ka sngi Palei ha jingïadonlang u MLA ka Mawhati Constituency Bah Charles Marngar, Bah HM Shangpliang, Bah Alvin Sawkmie bad ki nongkyrshan ka NPP.
U la pynpaw ba kum u khun ba duk u bym ïoh leit skul bha ha ka por ba u dang khynnah u la hap ban pep skul shisnem hadien ba la pyndep ïa ka klas-3, sa shisnem ynda la pyndep ïa ka klas-6 bad ha ka snem kaba lai ka dei mar shu dep ïa ka klas – 8 namar u hap kyrshan ïa ki para ba kin ïoh leit skul lang.
U la pynkynmaw ba ha kito ki por ym pat don skhim Sorkar ban ïarap ïa ki longïing kiba duk kumta hap ban ïakhun ban kyrshan hi.
Kumta kum u briew uba ieid ïa ka pule puthi u la seng lai tylli ki skul ha ka thaiñ lajong bad la siew tulop ïa ki nonghikai da ka tulop ba u ïoh naba u hikai ha skulbah NEHU.
Kumta u la buh ïa kane ka mat kaba hakhmat ba lada u shah jied kum u MP ha kane ka ilekshon, u kwah ba ka Sorkar kan pynbiang ïa ka rukom treikam ïa ka pule puthi (education policy).
U la pynkynmaw ba ha u snem 1998 haba u la wan hikai sha Mawsynram Border Area College hynrei u la phong beit da ka juh ka jaket ha ka por ba jur u slap haduh ar snem.
U la ong ba ka jingrung sha ka NPP ka long ba ka dei ka seng kaba wanrah ïa ki kam pynroi namar u la pynkynmaw ba naduh ba u wan hikai sha Mawsynram kumba arsnem shiteng bad ha Mawkyrwat kum u Principal haduh 6 snem, ka surok ha Mawphlang shaduh Weiloi kam ju bha watla ki la shna man u snem hynrei naduh ba synshar ka NPP kane ka surok ka la bha bad ka la neh.
