Khliehriat, Jymmang 28
Uwei u briew la kynnoh ba u la shah thombor ha u Officer In-charge jong ka Umkiang Police Patrolling Post, East Jaiñtia Hills District, ryngkat bad ki pulit jong u kaba la jia ha ka 21 tarik Jymmang.
Une uba shah thombor u dei u Joslymon Lyngdoh, khun jong u Bah Dominic Myrchiang uba shong ba sah ha ka shnong Umkiang, East Jaiñtia Hills District.
Katkum ka kyrwoh khubor ba la phah da ki Kmie ki Kpa jong utei lanot, la kynnoh ba kitei ki pulit kila leh ïa kane ka kam thombor da kaba bom bad tied haduh ba un da jngem, hadien ba kila kem ïa u ha kaba ïadei bad ka mukotduma ba la register pyrshah ïa u ha Rongpur Out Post Police Station, Silchar, Assam.
Shuh shuh ka kmie u kpa kila kynnoh, katba u khun jong ki, u dang don hapoh ka jingpeit jong ki pulit ha Umkiang Police Patrolling Post, ki pulit kila pyndonkam da ka bor ban pynshitom ïa u khun jong ki khlem jingsngewsynei haduh ba u la mynsaw jur bad mynta u don hapdeng jong ka jingshah sumar ha hospital.
Halor kane ka jingshah thombor, ki bahaïing kila rai ban leit buh da ka jingujor ejahar sha u Superintendent of Police ka East Jaiñtia Hill District bad kumjuh sha ka Meghalaya Human Right Commission, Shillong, khnang ba kin ïoh ïa ka hok.
