Shillong, Jymmang 28
Ka rynsan ïalap ilekshon MP Lok Sabha shiteng samoi ka la sdang ban shongshit namar ka MDC na Nongskhen Constituency ka Kong Grace Mary Kharpuri kaba dei ruh ka President ki longkmie ka NPP ka la ther tyngeh ïa ka Voice of the People Party (VPP) namar naduh ba la synshar ha KHADC kaba la ïaid mynta la shisnem tam ym pat ïoh skhim wat tang shi naia ruh.
Kane ka jingther tyngeh ka Kong Grace ïa ka VPP ka dei ha ïew Mawsynram kaba la long ha ka sngi Palei ka 28 tarik Jymmang 2026 kaba dei ha ka jingïalang ban pan jingkyrshan ïa u Dr. DRL Nonglait uba dei u kyrtong ka NPP uba la pynkhreh ban ïakhun ïa ka ilekshon MP Lok Sabha kaba shiteng samoi ban sa long noh shen.
Ka Kong Grace ka la ong ba naduh u snem 2009 ba ka la long MDC, ki kam pynroi ki wan beit ha man ki constituency hynrei ha kine ki shisnem tam naduh ba la synshar ka VPP ki MDC haduh mynta kim pat ïoh skhim wat tang shi naia bad kane ka la pynlong ïa ki paidbah ban buh jingkylli ïa baroh ki MDC.
Ka la ong ba ka jingbym ïoh skhim ka dei namar ka VPP kam don lynti ban leit sha Delhi takadaw kim ïoh skhim, ym dei kum ka NPP kaba biang ki lad ki lynti ban leit sha Delhi ki wanrah skhim da ki klur ha KHADC.
Ka Kong Grace Mary ka la ong ba don ki nongmihkhmat kiba la jied tang namar ba ki ïohi ha rynsan social media hynrei kim tip ïa ka jinglong jong ki.
“Nga burom ïa kaei kaba ki paidbah ki la jied hynrei ha kane ka samoi treikam haduh mynta ki don ki MDC haba la ïaid mynta la shisnem shiteng ngam pat ithuh bad ngam tip ruh ïa ka kyrteng jong ki,” ka la ong.
