Shillong, Jymmang 29
Ha ka jingïalang ba la khot pynlong da ka Voice of the People Party (VPP) ha Sohra halor ka phang ban pynshai ïa ka jingbym pat ai sanad ka Executive Committee (EC) ka Khasi Hills Autonomous District Council (KHADC) ïa u Marremdor Syiem, da ki spah ngut ki la wan ban sngap ïa ka jingpynshai na u nongïalam ka Party.
Haba kren ha ka jingïalang u President ka VPP u Bah Ardent Miller Basaïamoit u la pynshai ba ka jingkwah jong ka EC ka long ba ka bor jong u paidbah kan phai biang sha u paidbah, ba u paidbah u khun u hajar jong ka Hima Sohra kin tip lut ïa ka rukom jied, ka rukom thung, ki jingtre hapoh jong ki Hima bad kiei-kiei kiba dei ban pynbeit.
U la kdew ba ka EC jong ka KHADC ka la pynmih ïa ka jingpynbna sha ki Syiem, ki Sordar, ki Raid ba kim dei ban aiwai ïa ki jaka jong ki khlem da ïoh jingbit na ka EC kaba dei kawei ka lad jingïada na ka jingpyrshang jong ka Sorkar ban dakhol bad ban pynlong ‘land bank’ ïa ki jaka.
Haba pynshai haba ïadei ki kynrum kynram hapoh ka Hima Sohra, u Bah Ardent u la sei da ki kot kiba batai shaphang ka rukom saiñdur jong ki longshuwa manshuwa bad ka jingïadei jong ka jaitbynriew bad ka synshar khadar. “Ha ka Saiñ-hima Saiñ-sima u Khasi u tip kumno ban buh dor ïa ka bor u Syiem bad ban buh dor ruh ïa ka dor u paidbah, ha kiei-kiei baroh ka bor u paidbah ka dei hakhlieh tam, ïa ka bor u Syiem la buh bad la mang ha kata ka rukom ba kam dei ban ïa jynthut ne ïatyngkhuh bad ka bor u paidbah, haba la pynkup ïa ka bor ha u Syiem u da buh u pud dei ha kane ka jingbuh pud ïa ka bor u Syiem ïa kaba la pynlong ïa u Syiem ban synshar, hynrei ban nym bat ïa ka bor synshar” la pule u Bah Ardent na ka kot “Ka Pyrkhat u Khasi” ba la thoh da u H. Anderson Mawrie.
U la ong ba katkum ka riti ka dustur ba la buh u Syiem ka Ri-Khasi u synshar hynrei um bat ïa ka bor ban synshar, “U long tang ka atiar jong ka Hima, namar ba ma ka ruh kam dei kaba kut, ba ka dei ka jong u paidbah bad kaba kut hi ka dei ïa u paidbah” u la ong.
U la ong dei namar kata ba ka VPP ka buh ïa ka thong ka jong ka ban pynkhuid ban pynthymmai bad ban pynkylla dur ïa ka jingsynshar khadar kaba la sniew dur haduh katta-katta bad ba ki paidbah kin tip ïa ka bor jong u paidbah ha ka synshar ka khadar.
