Shillong, Jymmang 29
Ka Voice of the People Party ha ka jingïalang paidbah ba la pynlong ha Sohra ha ka sngi Thohdieng ka la pynbna ba kan sdang biang ban pdiang ïa u synñiang (donation) na ki paidbah kiba kwah ban ïasnoh ktilang bad ka party, ha kaba ha kane ka sngi la pdiang ïa ka jingai u paidbah nong Sohra ha ka ha ka jaiñ tapmoh.
U President ka Voice of the People Party u Bah Ardent Miller Basaiawmoit haba kren ha ka jingïalang u la ong ba ki don kiba ong ïa u ban sdang biang ban lum synñiang sha ka party, kumta ha kane ka jingïalang u la pan jingmut na ki paidbah ban lum biang, ha kaba ki paidbah nongkyrshan ruh ki la ïa mynjur.
U Bah Ardent u la ong ba nangne shakhmat ka party kan bteng beit ban lum ïa u synñiang (donation) ba u paidbah u kwah da kaba u la pynsngew ba don ki paidbah kiba kyrshan ïa ka party ki pynpaw ba kim bynnud ban ai sha ka party.
“Nangne shakhmat ngin hap ban lum beit namar bun kiba ai da ka mon sngewbha, wat haba ngi leit jingïalang ki don bun kiba pynkham ïa ngi ki nongïalam, nga tharai ngim dei ban sangeh ïa kaei kaba u paidbah u ai ka jingmut,” la ong u Bah Ardent.
Haba ïadei ka jingmih na kane ka jinglum pisa, u la pynshai ba ka party kan sa ai jingkheiñ ruh wat sha ka Election Commision of India ha kaba ïadei bad ka jingpyndonkam ïa ka pisa pilaiñ.
La ïohi ba ki paidbah ki la wan shakhmat ban ai ïa u synñiang (donation) ïa kaba la lum ha ka jaiñ tapmoh.”Kane ka dei ka jubab jong ki nongkyrshan prah ïa kito kiba sngew pangmet ïa ka borti blue” la ong u Bah Ardent.
