Shillong, Jymmang 29
U Symbud Myntri Rangbah Bah Prestone Tynsong u la pyntip ba ka Police Station bad Fire Service Station kin sa mih shen hajan ka jingkieng 4-lane ha Umshyrpi, kumjuh ka Tourist Information Centre bad ka Community Office jong ki Rangbah Shnong ka Upper-Shillong hajan ka thaiñ.
Ïa kane la pyntip da u Symbud Myntri Rangbah ka Jylla ba bat ïa ka kam Pohïing bad tnad PWD hadien ka jingleit jurip ïa ka jaka ban pynïeng ïa ka Police Station bad Fire Service Station.
U Bah Prestone, u la ong ba ka jingjurip ka dei kaba thmu ban shim rai ïa ki jaka na ka bynta ban tei ïa kine ki jingtei ba kongsan. “Ka jingjurip mynta ka sngi ka long tang ban ithuh ïa ki jaka, ngin sa buh ïa ka Police Station ba pura bad ka Fire Station ba pura ha ka jaka ba lait marjan ka jingkieng 4-lane ka Umshyrpi.”
U ïathuh ba ki heh Pulit kiba synran ïa u, ki la mynjur ïa kane ka jaka. “U Assistant Inspector General of Police (Administration), SP ka East Khasi Hills bad Shillong City ba synran ïa nga ha ka jingjurip, ki la pynpaw ba kane ka jaka ka dei kaba biang bha ban buh ïa kine ki station” u la ong.
Haba ïadei ka Tourist Information Centre u Bah Prestone u la ong ba kan dei ka jaka ka ban ai jingshakri ïa ki nongwan shangkai pyrthei bad Community Office kan dei na ka bynta ka jingdonkam jong ka shnong ka thaw.
“Ngi don ka jingpyrkhat ba ngin buh ïa ka Tourist Information Centre. Kumjuh ruh, man ka por ka Synjuk ki Rangbah Shnong ka thaiñ Upper-Shillong ki kyrpad ïa ka Sorkar ba kan ai jaka kumba 2000-3000 square feet na ka bynta ban shna ïa ka Ophis bad kumjuh ruh ka Community Hall” u la ong.
Hadien kane ka jingjurip, u la ong ba un sa khot ïa ka jingialang jong ka tnad ban kyntu shakhmat ïa kine ki projek bad ba kin sdang ban shim ïa ki sienjam kiba donkam ban pynthikna bad ban pynurlong ïa ki jingtyrwa kham kloi.
U Bah Prestone u la ainam ïa ka surok 4-lane halor ka jingpynduna ïa ka jingdheng kali ha Shillong. “Naduh jingkieng Umshyrpi haduh ba kut kane ka surok 4-lane, mynta ka shimpor tang 6-7 minit. Ha shuwa ka 4-lane, na 7th Mile sha jingkieng Umshyrpi ka ju shim por kumba 45 minit, teng-teng haduh shi kynta” u la ong.
U la ong ba ka jingpyndep ïa ka 4-lane ka la long ka jingkyrkhu ïa ka Jylla, ïa ki paidbah, ïa ki nongleit nongwan kiba wan bad ba mih na Shillong lyngba kane ka surok. Kim don jingeh shuh ban sahkut ha surok.
Haba bynrap u la pynpaw ba ki dang don ki kam kiba dang sahteng ban pyndep pura da ka kompeni, “Shen u Chief Engineer, National Highway, ha ryngkat ka kynhun jong u, ka Synjuk ki Rangbah Shnong, u BDO ka Mylliem bad ka kompeni kin sa ïa pynlong ïa ka jingjurip lang.”
U Bah Prestone u ïathuh ba ka Tourist Centre kan ai ïa ka jingshakri ïa ki nongwan shangkai kiba kwah ban leit sha ki jaka bapher-bapher. “Ha ki khyndiat sngi ban wan, ngan sa khot ïa ka jingïalang bad ka tnad Tourism ban ïa peit kumno ba ngin tei ïa kane ka jingtei ka ban pynsuk ïa ki nongwan jngohkai kiba kwah leit sha ki jaka bapher-bapher ha ka Jylla, kum sha Dawki, Sohra lane wat sha Nongstoiñ lane Ri-lum Garo lyngba kane ka thaiñ” u la ong.
Halor ka jingdon marjan ka jaka shipai, u Bah Prestone ula pynpaw ba ka Sorkar kan sa ïakren bad ki bor shipai. “Kane ka jaka ka don markhap ka jaka shipai. Ngi don ka jingïadei ba ïajan bad ka Sorkar India bad ïajan bha ruh bad ki bor shipai” ula ong.
“Ngi ïoh ïa kane ka jaka jong ka surok 4-lane lyngba ka jingïapyrshang lang jong ka Defence Ministry, ka Sorkar Jylla bad ka Ministry of Road Transport. Haba ïadei bad ka jaka ba ngi tyrwa pynïeng ïa ka Tourist Centre, ngin pynthikna ban ngin ïakren ïa ki bor shipai ba kin kyrshan ïa ka Sorkar, namar kane kam dei ka jingmyntoi shimet hynrei ka jingmyntoi jong u paidbah” ula ong.
