Nongpoh, Jymmang 29
Ha kawei ka jingjia tyngkhuh kali hynnin ka step, u heprit uba dang 11 snem ka rta u la duh noh la ka jingim ba kordor tang namar ka jingpynher sted bad ka jingñiah khlem akor jong uwei u nongñiah kali Bolero Pick-Up uba la shoh khawiang.
Katkum ka khubor ba la ïoh lum, la ïathuh ba katei ka jingjia ka dei ha ka por 9 baje mynstep hynnin ka sngi ha ka shnong Warmawsaw jong ka thaiñ Ri-Bhoi Sepngi bad ïa katei ka Bolero Pick-Up kaba don ïa u nombor ML 05 U 4961 la ñiah da u Bah Taidan Makri.
La ïathuh ba utei u heprit uba la tip kyrteng kum u Ferdinel Wahlang uba dang pule Klas V ha Brensly Secondary School, Warmawsaw, uba la shah tynrah ha katei ka Bolero Pick-Up, la pynkit noh mar-mar sha Patharkhmah CHC, hynrei namar ka jingjur jong ka jingmynsaw, u la khlad noh hapoh katei ka jaka ai jingsumar.Halor kane ka jingjia, ki nongïalam ka KSU, HNYF bad FKJGP jong ka thaiñ Ri-Bhoi Sepngi kiba la leit ban synran lang ïa ki bahaïing utei u heprit sha jaka ai sumar, ki la pynpaw ïa ka jingpynrem jur halor ka jingñiah kali khlem akor jong utei u Bah Taidan Makri kat haduh ba shim noh ïa ka mynsiem ba lui-lui jong u heprit.
Nalor ka jingshoh khawiang bad pynher sted ha ka por ñiah kali, ki nongïalam seng ki la pynpaw ïa ka jingartatien bad suba ba lehse utei u Taidan Makri um pat don ruh wat ïa ka laisen ñiah kali.
Kumta na ka liang ka jong ki, ki la kyntu jur ïa ki bor pulit ka Patharkhmah ba kin leh da kaba tyngeh ïa utei u nongñiah kali khlem-akor katkum ki kyndon jong ka aiñ bad kyrpad ruh ban pynjur ïa ka jingtalasi kali ba kynthup naduh ki saw shaka bad ki ar shaka kumjuh, khnang ban lah kumno ban tehlakam bad lait na ki jingjia ba sngewsih hadien-habud.
