Shillong, Jymmang 29:
U Myntri ka tnad bording Bah Metbah Lyngdoh ula pyntip ba ka jingpynlip bording elektrik ha ki katto katne ki bynta jong ka Jylla kadei namar ka jingpynïaid shakhmat ïa ki skhim Revamped Distribution Sector Scheme (RDSS) bad ki kam ha ka ban pynpoi ïa ka bording elektrik sha ki ïing ki sem.
Ula ong ba kine ki jingpynlip ïa ka bording kidei ki bym lah kiar na ka bynta ban pyndep ïa kitei ki projek.
U Bah Metbah u la ong ba phin sa ïohi ïa ka jingbun ïa ka jingpynlip ïa ka bording elektrik hangne hangtai namar ba ki skhim bapher-bapher ki dang ïaid shakhmat, kum ka RDSS bad kiwei kiwei, ryngkat bad ka jingpynpoi shuh shuh ïa ki bording elektrik ha ki ïing ki sem.
Ula ong, ba ka jingpynlip bording ka long kaba donkam namar ban pynthikna ïa ka jingshngain ïa kiba trei ïa katei ka kam.
U ong biang ba ka tnad kam lah ban trei ïa ki kam ki jam lymda khlem pynlip shwa ïa ka bording elektrik, hynrei shwa ban pynlip la dep ruh ban ai lypa ïa ki jingtip sha ki bor pynïaid shnong.
U pyntip ruh ba ka RDSS, kadei ka skhim kaba la bei da ka Sorkar Pdeng da ka jingthmu ban pynbha ïa ka rukom ai jingshakri kaba ryntih bad ka jingpynneh ïa ka ïoh ka kot jong ka rukom sam ki kompeni ïa ka bording lyngba ki jingtei kiba la dep ban kyntiew kyrdan bad ki smart meter.
Kane ka jingkren u Bah Metbah kala wan hadien ba kala don ka jingujor jong ki paidbah halor ka jingbym pynthikna ïa ka por bad ka jinglip khah khah ka bording elektrik ha kylleng ki jaka bad ha kylleng ki district.
