Shillong, Jymmang 29
U MLA ka Mawkynrew Konstitwensi, u Bah Banteidor Lyngdoh, ha ka 29 tarik u Jymmang 2026, u la plie paidbah ïa ka Gender Resource Centre (GRC), ha Jongksha, ka ban ai ka jingtip bad jinghikai na ka bynta ka imlang ka sahlang ha katei ka thaiñ.
Kane ka Gender Resource Centre (GRC), kadei kaba ar ha ka Jylla, kaba nyngkong kadei kaba la plie ha Ri Bhoi District bad mynta la ïoh ban plie pat sa ha Jongksha, Mawkynrew C&RD Block.
Nalor u MLA ka thaiñ, ha kane ka sngi la ïadonlang u MCS, Project Director, Bah P.T Passah, Bah G Dkhar, BDO Mawkynrew C&RD Blok, Kong M Kharmalki, ki longkmie, ki longkpa ka thaiñ bad kiwei-kiwei de.
Haba kren ha kane ka jingïalang, u Bah Banteidor Lyngdoh u la ong, ba kane ka Gender Resource Centre (GRC) ha Jongksha, kan ïarap shibun na ka bynta ki paidbah nongshong shnong, la ka long ki longkmie, longkpa, ki samla bad haduh ki hep kiba rit ruh kumjuh.
U la ong ba kane ka centre, kan long ka jinghikai haba ïadei bad ka jingsniew, ka jingjyllei ka jingshah batbor ïa ki khynnah ha ka Jylla, ki jinghikai haba ïadei bad ka jinglong jingman ka imlang sahlang bad kiwei-kiwei de.
“Ngi sngewkmen ba la ïoh ban plie ïa ka GRD, hynrei ngi ngeit skhem ba kane ka ophis kan nym long tang ban shu plie sa khang tala noh. Ki kam kin tyllun na ka bynta ka jingbha ha ka imlang ka sahlang baroh kawei,” la ong u Bah Banteidor.
U la ong “Ngi sngewthuh shai ba kane ka centre, kan dei shisha ka jingkyrkhu na bynta ka imlang ka sahlang. Namar ngi ïohi shisha ïa ka jingshah banbeiñ ki briew jong ngi, kiba naduh ki khynnah, ki longkmie, da kaba ong ba kane kadei ka jingïohi jngai jong ka Sorkar India ban wanrah ïa kum kane ka centre, ban ai ka jinghikai ha ka imlang ka sahlang”.
U Bah Banteidor u la ong, ba um kwah ban ïathuh ba haei ki shnong kiba la jia ki jingjia shah ban beiñ bad ki jingeh, hynrei baroh ki tip, ba ha man la ki shnong, ki jingjia shah banbeiñ, ki jingeh ki ju ïai jia na ka por sha ka por. Kane ka centre ka long ruh kum shibynta, ban ai ïa ka awareness program, ki ban ïarap ban batai ïa ka jingshisha ba ka aiñ hi ka treikam shisha.
“Nga kwah ba kane ka konstitwensi Mawkynrew kan ai shisha ïa ka jingïarap lyngba kane ka centre, ba ki khyllung-khynnah, ki kmie ki kpa, kin shim ïa kane ka bynta, ba kumno kin ïoh ka jinghikai ban batai ha la ki jong ki ïing ki sem, lyngba ka SHG ruh, ki VO,” la ong u Bah Banteidor.
U la bynrap ruh ba khamtam eh kum ki jingjia shah batbor ki khynnah kiba la jyllei bha ha ka Jylla bad ha ka thaiñ Mawkynrew, bad ban ïada ïa kane, “Ngi lah ban hikai khnang ba kin sngewthuh, ba kin nym bakla halor kine kiei-kiei baroh, bad khamtam eh ban wanrah ïa ka imlang ka shalang kaba don akor don burom.”
Ym tang katta, kane ka centre kan ai jinghikai ruh haba ïadei bad ka jingshah ieh khunrei ki kynthei, ba ki shynrang ki hap ban siew ka bai bam sha ka lok, lada ki ieh khunrei, la ong shuh-shuh u Bah Banteidor Lyngdoh.
Haba pynkut, u Bah Banteidor u la kyntu ïa baroh ki longkmie, ki longkpa ba kin ïatreilang khnang ban wanrah ïa ka imlang ka sahlang kaba don akor.
Ha kane ka sngi, la sam ruh da ka song pisa sha ki nongïalam SHG na ki shnong bapher-bapher, ban pynïaid shaphrang ïa ki kam jong ki, ha ki shnong ki thaw.
La ïoh ruh ka jingkren lyngkot na u Bah P.T Passah, MCS, Project Director, ka Kong M.Kharmalki.
