Shillong, Jymmang 29
Ka Meghalaya kan jied ïa u MP Rajya Sabha ha ka 18 tarik u Jylliew 2026 bad ka jingñiew vote kan long hi ha kane ka juh ka janmiet, pynbna u Chief Electoral Officer (CEO) Dr. BDR Tiwari ha ka sngi Thohdieng jong ka taïew hadien ka jingbatai ïa ki seng saiñ pyrthei ïa ka rukom pynïaid ïa ka ilekshon ba shisien ha ka arsnem.
Kane ka ilekshon kadei kaba la pynlong ban pyndap ïa ki shuki ki ban lait thylli ha ka 21 tarik u Jylliew.
“Ngi la ïashong jingïalang bad ki seng saiñpyrthei, haba ïadei bad ka jingpynlong ïa ka ilekshon Rajya Sabha ba shisien ha ka arsnem hapoh ka Jylla Megha-laya, namar ka samoi treikam u MP Rajya Sabha na ka Jylla ka la dei ban kut noh hapoh ka 21 tarik u Jylliew. Kumta donkam ban pynlong ïa ka ilekshon, la kumno-kumno ruh hapoh ka 20 tarik Jylliew” ong u Dr.Tiwari haba ïakren bad ki nongthoh khubor.
Haba pyntip ïa ka por ba la buh da ka Election Commission of India, u la ong ba ïa ka jingpynbna yn sa pynmih ha ka 01 tarik Jylliew.
“Ka sngi ba khatduh ban thep kyrteng ka dei 8 tarik Jylliew, ka jingbishar kyrteng kan long ha ka 9 tarik Jylliew bad ka sngi ba khatduh ban weng ïa ka jinglong kyrtong ka dei 11 tarik Jylliew, 2026” u la ong.
“Ka sngi ban thep vote kan long ha ka 18 tarik u Jylliew naduh ka por 9 baje mynstep haduh 4 baje janmiet. Ka jingñiew ïa ki vote kan long ha kajuh ka sngi ha ka por 5 baje janmiet bad ïa baroh ki kam ilekshon dei ban pyndep hapoh ka 20 tarik Jylliew, 2026” ong u Dr.Tiwari.
Ki bor pynïaid ileskhon, ki la leit ban khmih bniah ïa ka jaka pynlong ïa ka ilekshon hapoh ka Ïingdorbar Thawaiñ ka Jylla ha ka step sngi Nyngkong.
“Ngi la leit jurip ïa ka jaka ha ryngkat ki ophisar, na ka Meghalaya Legislative Assembly bad ngi la shem ba baroh ki long kiba ihun katkum ki kyndon, ka por bad ki jingpynbiang ïa ki jingdonkam kumba la bthah da ka ECI” u la ong.
U CEO u la batai bniah ïa ki kot ki sla ba hap pynbiang da ki kyrtong. “Ngi la batai ïa baroh kiei-kiei sha ki seng saiñpyrthei haba ïadei bad ka jingthep kyrteng kynthup ka jingaiti ïa ka Form 2C, affidavit ha ka Form 26, Security Deposit, Form A bad Form B, lada dei u kyrtong ka seng saiñpyrthei kynthup ka kyndon ba ïadei bad ka For C1 haduh C 8” u la bynrap.
U la batai ïa ka jingdonkam, ba ki kyrtong bad seng saiñ pyrthei ki hap ai beit ïa ki jingtip lada don ki kam bymman, ba ki la shah pynngat teng katkum ka jingbthah ka Ïingkashari Supreme Court bad jingbthah ba la pynmih da ka ECI. Haba batai ïa ka rukom thep vote, u Dr. Tiwari u la ong “Ka rukom pynïaid ïa ka ilekshon kan long da ka open ballot hapoh ka Representation of People Act 1951 ïa kaba la dep ruh ban batai sha ki seng saiñpyrthei”.
U la pyntip ba ïa ki notice jong ka jingïalang la dep ban phah lut sha baroh ki seng saiñpyrthei, hynrei ki don katto-katne ki bym shim la wan ïashim bynta.
“Ngi la pyrshang ban ïakren bad ki lyngba ka phone hynrei namar ba ki don ki kam shawei, kim shym la lah ban wan ïashim bynta” u la ong.
Halor ka ilekshon Lok Sabha, u CEO u la ong “Ka ilekshon kan sa long hadien ba ka ECI ka la pynbna ïa ka tarik. U la pynthikna ruh ïa ka jinglong ba la khreh ban leh ïa ka Special Intensive Revision jong ka Electoral Roll. “Ki nongtrei ban khmih ïa ka ilekshon, ki long kiba la khreh beit. Namar la dep pynbna ïa ka tarik jong ka SIR, na ka bynta ka Jylla Meghalaya, ngi la long kiba la pynkhreh ban leh ïa ka SIR hapoh ka Jylla” ong u Dr. Tiwari.
