Shillong, Jymmang 29
Ka Meghalaya Two-Wheeler Commercial Permit Holder (MTCPH) ka la ujor sha ka Deputy Commissioner (DC) ka East Khasi Hills ban pynshitom da kaba tyngeh ïa ki riew shimet kiba kamai arshaka (bike taxi) khlem ki kot ki sla kiba biang, haba kdew ba ka jingkamai khlem ki kot ki sla ka wanrah ka jingduhnong khajna bad buh jingma ïa ka jingshngaiñ jong ki nongleit nongwan.
Ha ka shithi sha ka Deputy Commissioner, ka Kong RM Kurbah, bad Chairman jong ka Regional Transport Authority, ka MTCPH ka la ong, “bun ki riew shimet kiba treikam kum ki nongpynïaid ïa ki arshaka ban kamai (bike taxi) khlem da ïoh ïa ka jingbit bad jingmynjur ba donkam na ka tnad ba dei khmih”.
Ka shithi ka la kdew ruh ba ki jingkamai da ki arshaka khlem jingbit, ka long ka jingpynkheiñ ïa ki kyndon ba la buh hapoh ka aiñ kali, Motor Vehicle Act, 1988, Motor Vehicle Aggregator Guidelines, 2020 bad kiwei kiwei de ki kyndon jong ka aiñ.
“Kum kine ki kam be-aiñ kim wanrah tang ïa ka jingduhnong ha ka khajna, hynrei kaba kongsan eh ka buh jingma kaba khraw ïa ki nongleit nongwan, namar ka jingbym don ka jingpynshisha kaba biang na ka tnad pulit, ka jingïada na ka Commercial Insurance bad kiwei-kiwei ki jingbud ryntih ïa ki kyndon” la kdew ka jingujor.
Ka MTCPH ka la kynthoh, ba ka jingbteng ban treikam jong ki riew shimet ban kamai da ki arshaka khlem ki kot ki sla, ka long ka jingpynkheiñ ïa ka kamai kajih jong kiwei pat kiba ïaid katkum ka aiñ bad kiba la noh synñiang ruh sha ka khajna jong ka Jylla.
Ki samla ba la ïoh jingbit ban kamai da ki arshaka, ki la kyntu ïa ka ophis DC ban “shim ïa ki sienjam kiba tyngeh pyrshah ïa ki riew shimet kiba kamai khlem ka jingbit bad bthah ïa ki Enforcement Officer ban khanglad ïa kum kine ki kam be-aiñ.”
Ki la kyrpad ruh ïa ka bor District ban mang bad ithuh ïa ki jaka ïeng arshaka, kiba biang ha ki jaka kum ha Khyndailad, Iewduh bad kiwei-kiwei ki jaka ïew, kiba bun briew, khnang ba ki nongleit nongwan kin ithuh ïa ki, lada ki donkam arshaka ban leit jingleit.
