Shillong, Jymmang 29
Ka National People’s Party (NPP) kam pat shim rai halor u kyrtong na ka bynta ka ilekshon Rajya Sabha kaba la buh ban long ha ka 18 tarik u Jylliew.
Halor kane, u State Organising Secretary ka seng u la pynpaw ba ïa ka rai yn sa shim tang hadien ba la dep ïasyllok bad ki bor ba dei khmih.
“Ngi khmih lynti ba ka seng kan pynïeng kyrtong hynrei palat ïa kata, ngam lah ban ong eiei, ngim pat rai haba ïadei bad u kyrtong,” la ong u State Organizing Secretary ka NPP, u Bah Don War haba kren sha ki nongthoh khubor hadien ka jingïalang ba la pynïaid da u Chief Electoral Officer (CEO) halor ka ilekshon Rajya Sabha.
“Ngan sa rah sha ki bor ba dei khmih, nangta ngin sa rai halor kiei-kiei hadien habud,” u la ong.
Ka ilekshon Rajya Sabha ka dei kaba ju long man ka ar snem ban pyndap ïa ki shuki kiba sah thylli katba ki dkhot ki dang pyndep ïa ka samoi treikam jong ki.
Halor katei ka jingïakynduh, u Bah War u la ong ba ka seng ka la ïakynduh ïa u Chief Electoral Officer (CEO) na ka bynta ban ïoh jingshai halor ki jingdonkam ha ka rukom pynïaid kam hashuwa jong ka jingthep ‘vote’ ka ban long ha ka 18 tarik u Jylliew.
U la bynrap ruh ba ka jingïakren ka long tang halor ki kam ilekshon.
