Shillong, Jymmang 29
U khlieh nongïalam ka United Democratic Party (UDP) bad Myntri ka Sorkar Jylla, Bah Metbah Lyngdoh ha ka Sngi Thohdieng u la ong ba ka seng kam pat rai la kan ïakhun ne kyrshan ïa u kyrtong ka NPP ha ka ilekshon ban wan sha ka Rajya Sabha.
“Ngim pat rai eiei mynta. Ngim pat tip la ngin pynïeng kyrtong ne em, kumta ngi dang hap ban rai halor kane,” la ong u Bah Metbah ha ki nongthoh khubor haba kylli halor ka nongrim jong ka seng haba ïadei bad ka ilekshon ban wan sha ka shuki Rajya Sabha (kaba marwei) ha Meghalaya.
U la ban biang ba ka UDP kam shym la pynlong ïa kino-kino ki jingïakren halor katei ka bynta.
“Ngim pat rai eiei, ngim pat ïakren”, u la ong.
U Bah Metbah u la ban jur ba ka jingïamir jingmut hapoh jong ka seng bad ki nongthaw aiñ jong ka kan long kaba hakhmat eh.
“Ngam don eiei ban ong shaphang kiwei,” u la ong.
“Nyngkong eh nga kwah ban kren shai bha ba ngan pyrkhat nyngkong eh ïa ki MLA jong ngi. Ngin sa ïakren hapoh ka seng,” u la ong.
La hato ka NPP ka la kynjoh ktien ne em ban pan jingkyrshan, u Bah Metbah u la ong ba ka seng kam shym la ïoh ïa kum kata ka jingkyrpad.
“Ym don eiei haduh mynta”, u la ong. “Ka dang jngai bha,” u la bynrap.
Ka samoi treikam jong u MP ka Rajya Sabha na Meghalaya kan sa kut noh shen.
