Shillong, Jymmang 29
U Myntri Rangbah ka Jylla, u Conrad K. Sangma u la ong ba ka Meghalaya bad Assam ki la ïa mynjur ban shim ïa ki sienjam ba mardor ban tem ïa ka jingïakynad ha Lapangap – ka jaka khappud hapdeng ki ar Jylla.
U Conrad u la ong ïa kane hadien ka jingïakynduh bad u Myntri Rangbah ka Assam, u Himanta Biswa Sarma ha Guwahati ha ka Sngi Thohdieng.
U Conrad u la ong ba ka jingïalang ka long kaba “manbha bad kaba tei” bad ka la pynleit jingmut tang halor ka jingïakynad ha Lapangap, kaba la pynmih ïa ka jingsngewkhia ha baroh ar Jylla ha kine ki katto-katne taïew ba la dep.
“Ha ryngkat u Sym-bud Myntri Rangbah ka Jylla, Bah Sniawbhalang Dhar, ngi la ïakynduh ïa u Myntri Rangbah ka Assam, u Himanta Biswa Sarma ha kamra treikam jong u ha Guwahati,” ong u Conrad.
“Ka jingthmu ba kongsan jong ka jingleit jong ngi ka long ban ïakren halor ka jinglong-jingman kaba dang ïaid ha Lapangap kaba jia mynta ha shilynter ka khappud Assam-Meghalaya,” u la ong.
U la bynrap ba ki jingpyrshang ban pynïadon bynta lang ïa ki nongshim bynta ka la ïaid la bun taïew mynta.
“Ha kine ki bun sngi bad ha ka jingshisha da ki taïew, ngi la pyrshang ban lum lang ïa ki nongshim bynta bapher-bapher ban pynbeit ïa ka jingeh bad ban wad ïa ka lynti nangne shakhmat,” u la ong.
Ki ophisar na baroh ar tylli ki Sorkar, kynthup ïa ki ophisar ha ka kyrdan jong ka distrik, ki la ïashim bynta lang ha kane ka jingïalang.
“Ngi la shim katto-katne ki sienjam kiba lah ban ïarap ïa ngi ban tem ïa ka jingeh bad ki ophisar jong ngi kiba khmih ïa ka kam kin sa shimkhia ïa kane ha kine ki khyndiat sngi ban wan ban pyrshang bad pynbeit ïa kane ka jingeh,” la ong u Conrad.
U la kyntu ruh na bynta ka jingïatreilang jong ki nongshong shnong bad ki ophisar Sorkar na baroh arliang khappud.
“Ngi dei ban trei ha ka rukom kaba manbha bad ngi dei ban trei ha ka rukom ka ban tei bad ban shaniah iwei-ïa-iwei pat; bad trei ha kata ka rukom ba ngi lah ban lap ym ïa ka lad jingpynbeit kaba shi por hynrei ka ban ïaineh,” u la ong.
Halor ka mat ïakajia pud kaba kham ïar, u Conrad u la ong ba ki jingïakren ba kham bniah kin sa long tad haduh ban da dep ban thaw pura ïa ka Kynhun Myntri jong ka Assam.
“Ngi la rai ruh ba ynda ka Sorkar Assam ka la bit la biang pura ha ka liang jong baroh ki Myntri Sorkar bapher-bapher, ynda la bam smai, ka jingïakren kaba kham bniah halor ka bynta kaba kham ïar jong ki kam khappud kan sa long ha kata ka por,” u la ong.
Shuh-shuh u la bynrap, “Kumta ngin sa shim rai ha kata ka por na ka bynta ka jingïadei kaba kham ïar, hynrei ka jingïalang mynta ka sngi ka la long tang halor ka mat jong ka Lapangap bad ngi kyrmen skhem ba ngin lah ban pynbeit ïa kane ka kam,” ong u Conrad, da kaba pan ïa ka jingïatreilang na baroh ki nongïashim bynta.
