Shillong, Jymmang 31
Ki nongïalam jong ka Jaiñtia Coal Owner Supplier Worker Association (JCOSWA) ha ka sngi Saitjaiñ ki la pynpaw ïa ka jingsngewdiaw haba ïadei ka jingbym shimkhia jong ka Sorkar ban thaw ki lad ki lynti haba ïadei kumno ban ïoh tih dewïong biang ha ka Jylla.
Haba kren sha ki nongthoh khubor u President ka JCOSWA u Bah Marshall S. B Biam u la ong ba ka kynhun ka kwah ba ka Sorkar ka dei ban leh eiei haba ïadei u dewïong, namar ka jingshem jingeh ki paidbah nong Jaiñtia na ka daw ba ka Sorkar kam shym la shimkhia ïa kane ka mat.
U la ong ba ka Sorkar la 12 snem mynta ka la khang ban tih ïa u dewïong bad ka khlem la leh eiei, namar kata ka kynhun ka kyrpad ïa ka Sorkar ba ka dei ban thaw ki lad ki lynti ban ïoh trei biang ïa ka jingtih ïa u dewïong kumba la ju trei ha ki por ba kham mynshuwa. U la ong ba ka Supreme Court ka la ai bor ba kino-kino ki jaka kiba hap hapoh ka 6th Schedule yn ym don ba lah ban tuklar ïa ki jaka namar ki dei ki jaka jong ki ‘riew shimet.
U Bah Marshall u la kynnoh ba ka Sorkar ka leh politik ïa kane ka kam bad kam kwah ba ki briew kin ïoh ban trei kumba trei kham mynshuwa, na kata ka daw ka kynhun ka la dawa na ka Sorkar ba kan ailad ïa ki bad ïa baroh kiba trei dewïong ban trei, namar ba ka jingkhang ban tih dewïong ka ktah ïa ki paidbah bad haduh ka ïoh ka kot jong ka Sorkar Jylla ruh ka la hiar.
U la ong ruh ba ka Sorkar ka dei ban khang noh ïa ki karkhana dewbilat ban wan kit dewïong na kiwei ki Jylla bad ka kynhun ka pyrshah jur ïa kane bad bynrap ruh ki karkhana ki dei ban ailad ïa ki trai Jylla ban pynpoi dewïong sha ki karkhana.
Haba pynpaw haba ïadei ka SOP ba ka Sorkar ka ong ba ki trai jaka ki dei ban don 100 hecter, ka kynhun ka pynpaw ïa ka jingbym ïahap namar ha ka Jylla Meghalaya ki trai par dewïong kim don jaka haduh kat kata ka jaka, namar ha ka Jylla kiba bun hi ki don jaka tang 3, 4 akar, kumta ka kynhun ka pynpaw ba kam sngewïahap satia ïa kane.
U la kyntu ïa ka District Council ba ka dei ban thaw ïa ki aiñ ban ïada ïa ka khyndew ka shyiap la ka dei halor u mawshun, ne kiwei ki marpoh khyndew.
Shuh-shuh une u Bah Marshall u la pynpaw ba na ka liang ka jong u, ha ka 1 tarik u Jylliew un sa leit ban shong ïakhih khlem buh por hakhmat ka ophis u Deputy Commissioner, u la khot ruh ïa ki paidbah ban wan ïashim bynta lang ha kane ka sngi.
