Nongpoh, Jymmang 31
U Dr Mansukh Mandaviya, Myntri jong ka Sorkar Pdeng ba dei khmih ïa ka tnad Labour & Employment bad ka Youth & Sports Affairs ha ka sngi U Blei u la hiar jurip ïa ka jingpyntreikam ïa ki skhim pynroi kiba pher bapher kiba la pyntreikam katkum ka Aspirational District kumba ka Ri Bhoi District ruh ka dei kawei na kita, kaba la dep ban jied da ka Sorkar Pdeng.
Ha kane ka jingwan jurip, u Myntri Sorkar Pdeng u la pynlong ruh ïa ka jingïalang ha ka Conference Hall jong ka District Rural Development Agency (DRDA) ha Nongpoh ha ka jingïadon ryngkat u MLA ka Nongpoh, Bah Mayralborn Syiem, ki heh ophisar na ki tnad treikam bapher bapher ka district. Ha kane ka jingïalang la phaikhmat kyrpang kumno ban pyntrei bha ïa baroh ki skhim pynroi kiba ka Sorkar Pdeng kala pyntreikam hapoh ka district.
U Deputy Commissioner ka Ri Bhoi uba thymmai, u Abhishek Saini ha kane ka jingïalang u la ai ïa ka ‘presentation’ kaba shai sha u Myntri ka Sorkar Pdeng ban pyni ïa ka jingïaid beit ki kam pynroi kiba la pyntrei hapoh ka district ba kynthup naduh ka koit ka khiah, ka pule puthi, ka rep ka riang nalor kiwei kiwei ki kam pynroi.
U Bah Mayralborn Syiem uba la wan ban ïadon ryngkat ha ka jingïalang, u la ïoh ban kyrpad bad pynsngew sha u Myntri ka Sorkar Pdeng halor bun ki kam pynroi kiba kum ka Ri Bhoi district ka dang donkam na ka bynta ka jingmyntoi jong ki paidbah nongshong shnong hi baroh.
Kawei na ki mat ba hakhmat eh kiba u Bah Mayralborn u la ïoh ban pynsngew ha u Myntri ka dei halor ba ka Ri Bhoi kum ka Aspirational District kala dei ban ïoh noh ïa ka Medical College, da kaba pynpaw ba watla ka Civil Hospital ha Nongpoh kam pat biang satia ïa ki kyndon, hynrei lyngba ka jingshimkhia jong ka Sorkar Pdeng bad kumba ka dei ka Aspirational District, kala dei ka por ba kan ïoh noh ïa ka Medical College na ka bynta ka jingmyntoi bad ïohkam ïohjam jong ki paidbah nongshong shnong hi baroh.
Kiwei ki mat kiba u Bah Mayralborn u la pynsngew sha u Myntri ka long ba un ïarap tuklar lem halor ka ITI ha Nongpoh, ka National Games ka ban sa long ha u snem 2027 bad ban pynïoh ïa ki lad jingïarap ba kyrpang na ka bynta ki Integrated Village Cooperative Societies (IVCS).
Kumba long mynta ka ITI ha Ri Bhoi ka dang treikam ha ka ïing shongwai bad ka dang don ruh ïa ki kumba ar ne lai tylli ki ki sobjek ai jinghikai, bad kum u MLA u la ban jur ba la donkam ban pynbun ïa ki sobjek jinghikai bad ruh ban pynïoh noh ïa ka shlem treikam ba pura jong ka ITI lyngba ka jingshimkhia jong ka Sorkar Pdeng.
Ha kaba ïadei bad ka National Games ka ban long ha u 2027, u Bah Mayralborn u la pynsngew sha u Myntri ba un ïarap tuklar lem ba katto katne tylli ki jingïalehkai, yn lah ban pynlong hapoh ka district katkum ka jingïahap jong ka mariang kumba la ïoh jingtip ba ïa katei ka lympung ïalehkai, yn pynlong tang ha Shillong, Tura bad Jowai nalor kiwei de ki jylla ka thaiñ shatei lam-mihngi.
Shuh shuh ha kaba ïadei pat bad ki IVCS, u Bah Mayralborn u la ong, kumba long mynta kiba bun na ki Cooperative Society la ki dei kiba rep Sohtrun, kiba ri Sniang, kiba ri Syiar ne wat kiwei kiwei ruh ki bynta ki shem jingeh haduh katta katta da kaba ai nuksa ba ka jingshlei jong ki syiar kiba wan shalan tad na shabar ka jylla ka pynlong ïa ki syiar kiba ri hapoh ka district ba kim ïaid shuh bad shah khniot ha ka dor.
Halor katei ka bynta, u la ong ba na ka liang ka jong u, u la ïoh ban ïakren bad u Myntri ba un phah ïa ka kynhun na jylla Gujarat kaba kyrpang ban wad bniah bad sngewthuh jingmut bad ki nongrep la ki dei ki nongthaiñ jaiñ, ki nongri Sniang, nongri Syiar, nongrep Sohtrun bad kumta ter ter kumba katei ka jylla Gujarat ka dei kawei na kiba la kiew shaphrang ha ki bun ki bynta bad kaba sngewtynnad ka long ba utei u Myntri ka Sorkar Pdeng u la kular ban leh ïa kaba donkam na ka bynta ban ai jinghikai ïa ki nongrep bad ban don ruh ïa ka jingïasoi soskular sngewthuh jingmut kaba biang ym tang ban ai jinghikai, hynrei ruh wat ban shalan bad die ïa ki jingpynmih napoh ka district.
