Mynshwa ki ju ong ba ka Meghalaya ka dei tang ka lynti ïaid ban pynpoi ïa ki drok bapher-bapher sha kiwei pat ki bynta jong ka Ri. Hynrei kat nang ïaid ka por, kane ka la kylla namar kam dei shuh tang ka lynti ïaid, ka la dei syndon ka jaka shongneh jong u drok. Ïa kane ngi lah ban sngewthuh na ki jingkheiñ jingdiah ba la ai da ki pulit ha kaba ha kine ki khyndiat snem kiba la leit, ha kaba la ïoh ban kem da ki spah ki briew bad ban kurup ïa u drok uba shongdor da ki spah klur. Ka tnat pulit jan manla u snem, ka ïoh ban kurup drok kiba shongdor da ki klur tyngka bad kane ka pyni ba ka jingjyllei jong u drok ka jur bha, watla ki bor khmih ki la ïakhun ban tehlakam.
Napdeng ki spah ngut ngut kiba la ïoh ban kem, kumba 10 na ka 100 (10 per cent) kiba shah kem ki dei kiba donkti ha ki kam khaïi briew. Na kine kiba la shah kem, la kurup ïa u drok heroin bad kiwei kiwei ki jait jingdih buaid kiba ktah shi katdei eh ïa ka imlang ka sahlang. Ka jingïoh kurup drok kam pat kut tang kumne namar ki pulit ki la ïoh ruh ban kurup ïa ki ‘Yaba Tablet’ kaba la kiew bad kumjuh ruh ha ki snem kiba la leit, ki la ïoh ruh ban kurup ïa uwei na ki jait drok ba kham remdor bad khlaiñ bor bha, uba la tip kum u ‘Crystal Meth’.
Na ki jingkheiñ jingdiah lyngba ka jingïoh kem bad kurup, ngi la sngewthuh lypa katno ka jingjur ka jingwanrah drok sha kane ka jylla. Ngi dei ruh ban kynmaw ba kitei ki dei tang kiba la ïoh ban kurup. Sa katno pat u drok uba la lait sha ïew sha hat kiba ki pulit ki khlem ïoh satia ban kurup? Sngewshyrkhei wat tang ban pyrkhat ïa kata ruh namar ka long shisha ka jingeh ka bakhraw ba kum ka jylla ngi ïakynduh. Mynshwa, ki la don tang katto katne ki jaka ba la bna ba ki bun ki nongdie bad nongpyndonkam drok. Mynta, ka bih jong u drok ka la saphriang wat sha ki nongkyndong ruh. Ha sor lei, ka la jan sar lut sha man la ki shnong bad ki dong.
Ryngkat bad ki pulit, ki shnong ki thaw, ki skul, kolej, skulbah bad baroh ki nongshong shnong ki dei ban ïatreilang. Ym don tang kawei ne ar kynhun ka ban lah ban ïakhun ïa kane ka jingeh ka bakhraw kaba kum ka jaitbynriew bad ka jylla ka mad. Wat ap haduh ba u drok un bam duh syndon ïa ki khynnah bad ki samla jong ngi kiba dei ka lawei jong ka jylla. Lada ngam jylliew, u drok u wanrah ïa kiba bun ki jingeh bad jingma ïa baroh. Wat ap haduh ba yn da don ki nongpyndonkam drok ha ïing ha sem. Wat ong ba tang kiwei kin ngat, nga te ngan lait. Long kiba husiar ïa la ki jong bad wat pynslem ban shim jingïarap nangne nangtai. Ka patok ne byndi kam dei ka kut ka ban lah ban bthat ïa u kynjri jong ka jingshah teh mraw ha u drok. Ka patok ne byndi ka dei eh na ka bynta ki nongkhaïi drok kiba la riewspah da kaba pynsyrtok ïa kiwei. Na ka bynta ki nongpyndonkam, ym ki nongkhaïi, ki donkam jingsumar met bad mynsiem. Ïatreilang na ka bynta ka lawei lym kumta ka jingjot ka la ap lypa ïa baroh – bad ïa kiba pyndonkam bad kumjuh ruh ïa ki bym pyndonkam drok. Ngi kyrmen ba da ka jingwan ki kynhun niam ha kane ka kynti, ngin sa lah ban nang ïoh shuh ka bor ban pynduh pyndam ïa ki drok kiba la pynjot lut ïa kiba bun.
