Shillong, Jymmang 31
Ka kynhun ki Sengbhalang kiba hap hapoh ka Mawsynram C&RD Block ki la pynpaw ïa ka jingsngewbitar halor ka jingtorti treikam bad ka jingleh donbor ka kompeni Sai Computer Ltd kaba sam bording ha ka thaiñ.
Kine ki kynhun Sengbhalang ki kynthup ka Federation of Khasi Jaiñtia and Garo People (FKJGP) ka Hynñiewtrep National Youths Front (HNYF) bad ka Hynñiewtrep Youths Council (HYC) kiba dei na ka thaiñ Mawsynram.
Haba kren sha ki nongthoh khubor u Bah Tynshaiñ Ronsang Chairman jong ka kynhun u la ong ba ka kynhun ki sengbhalang ka la ïeng ban pyrshah naduh ba ka Sorkar ka sdang ban aiti ïa ka jingsam bording lyngba ka Meghalaya Power Distribution Corporation Limited (MePDCL) sha ki kompeni kiba kynthup ïa ka FEDCO Company bad ka Sai Computer Ltd.
U la ong ba ka jingpyrshah ki sengbhalang ïa kane ka jingaiti noh ka Sorkar ïa ka jingpynïaid ïa ka jingsam bording sha ka kompeni ka pulom noh tang namar ka jingbym ai jingkyrshan ki paidbah nongshong shnong ha kito ki por, hynrei mynta ki paidbah haba ki la mad bad ïakynduh jingeh ïa ka jingleh baheh ki nongtrei ha ophis bad ka jingkiewdor kynsan ka bai bording, ka la pynbitar ïa ki paidbah bad ai jingkyrshan ïa ka jingpyrshah ki seng bhalang.
Shuh-shuh u la ïathuh tang hadien shibnai ba ka Sai Computer Ltd ka wan ban pynïaid ïa ka jingsam bording, ki paidbah kiba kynthup na ki lai tylli ki Block kum ka Mawsynram C&RD Block, ka Mawphlang C&RD Block bad ka Ranikor C&RD Block ki la shah ktah bad kynduh jingeh shibun namar ka jingkiew dor ka bai bording bad kiwei.
U la ïathuh ba ka kynhun ha kine ki sngi ba la dep, ka la ïoh ban pynsngew ïa kine ki jingeh ha u Myntri ba peit ïa ka kam bording, u Bah Metbah Lyngdoh ha kaba u la pynpaw ba um don bor ban leh eiei, katba u la kular ba un ïakren ïa kane ka mat bad u Myntri Rangbah ka Jylla.
U la ong ba na ka liang ka kynhun bad ki paidbah ka thaiñ ki dawa ba ka Sorkar ka dei ban pynduh pyndam noh ïa ka jingïateh kular jong ka bad katei ka kompeni bad ka Sorkar ka dei ban weng mardor noh ïa ka jingpynïaid sam bording ka kompeni, ha kaba ki la kyrpad ïa ka Sorkar lyngba ka MePDCL ba kan shimti ban pynïaid hi ïa ka jingsam bording ha ka thaiñ Mawsynram.
U Bah Kyllang Thongni haba bynrap u la dawa ba ka Sorkar ka dei ban shimkhia ban pynbeit mardor ïa kane ka kam lym kumta kin shim da ka sienjam kaba kham tyngeh bad kata ka long kin leit tur paidbah sha Secretariat ka ban long kum ka jingleit ban tied jingkhang ïa u Myntri Rangbah ka Jylla.
