Mairang, Jymmang 31
Ka Dorbar Shnong Non-glait kaba hap hapoh ka Hima Mawiang Syiem-ship, Eastern West Khasi Hills District ha ka 30 tarik u Jymmang, 2026 ka la ïoh ban plie paidbah noh ïa ka jingkieng ïaid kjat bad ïa ka Viewpoint kaba la tip ruh kum ka Remkhla Valley Wahrilang Viewpoint.
Ïa kane ka jaka la plie da u Commissioner & Secretary ka tnad Tourism ka Jylla u Dr. D Vijay Kumar lyngba ka video call, katba ha katei ka jaka la sakhi ïa ka jingïadonlang ka Deputy Commissioner Kong Anita Kharpor, u Executive Director Technical MBDA Bah G Kharmawphlang, u ADC Bah M Diengdoh, u BDO ka Mawthadraishan Bah WL Massar, ka Tourism Officer Kong ST Shylla nalor kiwei ki ophisar Sorkar ha ka jingdonlang ki nongkitkam, ki nongïalam shnong ki VO, ki khynnah skul bad ki nongshong shnong.
Ïa kane ka jingkieng la tei lyngba ka skhim MBDA bad ka MGNREGA ha ka mang pisa kaba T.64,59,270 bad la plie ïa u mawnongrim da ka DC ka Kong Anita Kharpor kum ka kongsan ha ka jingïalang bad la khap ruh ïa u ribon kum ka jingplie paidbah ïa kane ka jingkieng bad ïa ka ‘Tourist Spot’ da u Bah G Kharmawphlang.
Lah ban kdew ba ka jingplie paidbah ïa ka Remkhla Valley Wahrilang Viewpoint ha ka shnong Nonglait kan long kawei na ki shnong ka ban khring ïa ki nongwan jngohkai pyrthei kiba ym tang na ka Jylla hynrei nabar ka Jylla bad kiba nabar ka ri ruh kumjuh.
Shuh shuh kane ka jaka ka long kaba itynnad bha na ka jingdon jong ka, ïa ka wah kaba la tip kum ka Wah Rilang bad ki lum kiba itynnad bha kiba ïohi kyndiang ïa ki lyngkha bad ki pyntha kba, kane ka jaka ka don sha them jong kawei na ki jaka jngohkai pyrthei kaba paw kaba ju tip kum ka dom Markham ne ka Dom Murok viewpoint.
U Commissioner & Secretary Vijay Kumar ha ka video ba u la phah, u la ai khublei kyrpang ïa ka Dorbar Shnong Nonglait kaba la lah ban plie paidbah noh ïa ki lai tylli ki jingkieng ïaid kjat bad ka Wahrilang Viewpoint bad u la ong ruh ba na ka liang ka Tourism kan ïai kyrshan ha kaba ïadei bad kane ka sienjam kaba ka shnong ka la shim bad ba un sa wan ban jngoh ruh ïa kane ka jaka.
Katba na ka liang ka DC ka la pynpaw ïa ka jingaikhublei ïa ki nongkitkam shnong Nonglait ba kila shim ïa ka jingkitkhlieh halor ka jingdonkam ki nongshong shnong ha kaba ïadei bad kane ka jingkieng ba ki la sngewthuh ban maramot bad ban shna thymmai hadien ka jingdkut ka jingkieng kaba rim.
Shuh shuh kala ong ruh kane ka jingplie ïa ka kane ka jaka jngohkai ka long kum ka sienjam ban kyntiew ïa ka ïoh ka kot jong ki nongshong shnong bad ki rukom kamai lyngba ka jingwan ki nongwan jngohkai pyrthei sha kane ka jaka.
