Nongpoh, Jymmang 31
Ka jingkilan met jong ki shipai na ki 12 tylli ki ri ba marjan bad ka India ïa kaba la tip kyrteng kum ka Partnership of Regional Armies for Growth and Transform-ation in the Indian Ocean Region lane PRAGATI ha ka ktien lyngkot kala poi noh sha kaba kut ha ka sngi Saitjaiñ ha Umroi Military Station. Kitei ki shiphai kiba la wan ban ïashim bynta ha kane ka jingkilan met, kin ïoh pat ban leit phai ïing ryngkat shi khung ki jinghikai pyntbit kiba kila ïoh lyngba kane ka jingkilan met.
Ka jingthmu ba kongsan jong kane ka jingkilan met PRAGATI 2026 kaba la pynlong ha ka sien kaba nyngkong eh ryngkat ki ri kiba marjan, kiba kynthup naduh ka Bhutan, Cambodia, Malaysia, Maldives, Myanmar, Nepal, Philippines, Seychelles, Sri Lanka, Vietnam, Indonesia bad Laos, ka long ban wanrah ïa ka jingïatreilang kaba kham ïajan bad kham bha, ka jingïashaniah markylliang bad ruh ban long kiba la pynkhreh kumno ban ïada bad wanrah ïa ka shongsuk shongsain ha ka thaiñ hi baroh kawei.
Ka sngi pynkut ïa kane ka jingkilan met, la wan ban ïadon ryngkat da ki hynriew ngut ki Vice Chief bad kumba 40 ngut ki heh shipai na ki ri kiba la wan ban ïashim bynta bad kitei la pdiang donburom da u Vice Chief jong ka Army Staff ka India, u Lieutenant General Dhiraj Seth.
Lyngba kane ka jingkilan met, ki shipai ki la ïoh ïa ki jinghikai ban pyntbit ïalade kumno ban ïakhun pyrshah ïa ki lehnoh ha ki jaka lum bad ki khlaw ki btap, ka jingkiew bad hiar lyngba ki mawlong mawteh, ki buit kumno ban ap shrip bad ban ïakhun ruh haba shah pyn ap shrip, ka jingïasiat ha ki lynti khlaw, ka jingïakhun ha ki kamra bad ki bos, ka jinglap ïa ki bom Improvised Explosive Device, ban pynkynriah ïa kiba mynsaw nalor kiwei kiwei de ki jinghikai.
Kane ka jingkilan met ka ai rynsan ruh ïa ki kynhun shipai khleh lang kiba la wan ban ïashim bynta kumno ba ki lah ban ïa sam markylliang ïa ki jinghikai, ban kyntiew shuh shuh ïa ka jingïatreilang bad ka jingïadei paralok kaba ïajan hapdeng ki para shipai na kawei ka ri sha kawei pat bad khamtam eh ban sam ruh ïa ka kolshor bad ka jingïadei shimet kaba ïajan hapdeng ki para shipai.
Kum shi bynta jong kane ka jingkilan met, ki shipai ka ri India ha ryngkat ka jingtreilang bad ka Federation of Indian Chambers of Commerce and Industry (FICCI), la rah ruh ban pyni paidbah ïa ki tiar bad ki kor ki bor ïada ri kiba paka tam kaba la pyni bad pynpaw sha ka pyrthei halor ka jingnang ïai kiew sted ka India ha ka jingpynmih ïa ki tiar ïada ri kiba la shna bad pynmih hapoh India hi lyngba ka sienjam Atmanirbhar Bharat, kiba la lah ruh ban shalan bad die shabar ri.
Lyngba kane ka jingkilan met, u Lieutenant General jong ka Army Staff ka India, u Dhiraj Seth u la shim kabu ruh ban pynlong ïa ka jingïakynduh marwei bad ki nongmihkhmat jong ki shipai kiba la wan ban ïashim bynta na kiwei ki ri kum shi bynta ban pynkhlaiñ shuh shuh ïa ka jingïatreilang ryngkat ha ka liang jong ka kam ïada ri bad ka jingïadei hapdeng ki para shipai na kawei ri sha kawei pat.
Ki heh shipai kiba la ai jingkren, kila pynpaw ba kane ka jingkilan met PRAGATI 2026 kala ai jingmyntoi shikatdei ïa ki shipai kiba la wan ban shim bynta bad kala nang pynkhlaiñ ruh ïa ka jingïatreilang hapdeng ki para shipai kumno ba ki long kiba la pynkhreh ha ki kam ïada ri bad ba ka jingjop jong kane ka jingkilan met kaba la pynlong ha ka sien kaba nyngkong eh, kan nang ai mynsiem bad kan long ruh ka nongrim kaba skhem ba yn nang lah shuh shuh ban pynlong ïa kiba kum kine ki jait jingkilan met ha ki por ki ban sa wan ba ka bynta ban wanrah ïa ri kiba don ha syndah bad ka duriaw Indian Ocean kaba shongsuk shong shngain bad kaba roi kaba par.
