Shillong, Jymmang 31
Ka jingangnud jong ki paidbah ka Mawsynram konstitwensi da ki phew snem naduh ba la ïoh ïa ka jylla lajong ka la urlong mynta namar ka Sorkar Jylla ka la mang pisa haduh shispah phraphew klur tyngka ban shna pynheh ïa ka surok naduh Weiloi-Mawsynram haduh Phlangwanbroi, East Khasi Hills District.
U Bah Alvin Sawkmie uba dei u MDC ka Mawsynram konstitwensi u la pyntip ba ka Sorkar Jylla ka la dep khot tender ban shna ïa ka surok na Weiloi sha Mawsynram ban kut haduh Phlangwanbroi.
U la ïathuh ba kane ka surok la mang ban pynlut haduh 180 klur tyngka.
U la ai khublei ïa ka Sorkar Hylla hapoh ka jingïalam u Conrad K Sangma kaba la sngap ïa ka jingud jong ki paidbah namar kane ka surok ka long kaba sniew bad kaba rit kaba buh jingeh ïa ki kali ban ïaid sharum shaneng.
U don jingkyrmen ynda la dep shna ïa kane ka surok, kan kyntiew ruh ïa ka kam jngohkai pyrthei sha Mawsynram kaba dei ka jaka ba jur slap ha pyrthei.
Katkum ka jingpynbna, u Additional Chief Engineer EAP PWD Roads, Meghalaya Shillong da ka jingaibor u Lat ka jylla Meghalaya ka la khot ïa ki kontraktor ban trei ïa kine ki surok kaba hap hapoh ka Meghalaya Logistics and Connectivity Improvement Project ba la bei tyngka da ka World Bank.
Kumban shu pynkynmaw ka Sorkar Jylla ka la ïoh ruh ban sdang ïa ka surok narum, Phlangwanbroi ter ter shaduh Laitumsaw kaba hap ha East Khasi Hills district bad bteng biang na Umpung haduh Ranikor, South West Khasi Hills District.
