Shillong, Jymmang 31
Ka jingpynkhreh ban ïakhun na ka bynta ka shuki ba marwei sha ka Rajya Sabha (ha Meghalaya) ka la ïaid shaid-shaid ha kaba ka NPP kan sa ïakynduh ha kane ka taïew ban pynbeit ïa u kyrtong jong ka.
Kumba ka long, ki don 3 tylli ki kyrteng kiba ka seng ka dang bishar mynta.
U Dr. W.R. Kharlukhi, u MP ba mynta ka Rajya Sabha, uba ka samoi treikam jong u, kan sa kut noh ha ka 21 tarik Jylliew, 2026, u la pynpaw bunsien ba um don jingthmu shuh ban bteng biang sa ïa kawei pat ka samoi treikam.
Na ka liang ka Election Commission ka la buh ïa ka tarik ban thep ‘vote’ na ka bynta ka shuki Rajya Sabha ha ka 18 tarik Jylliew, ha kaba ka jingthep kyrteng kan sdang naduh ka 1 tarik Jylliew, katba ka 8 tarik Jylliew pat kan dei ka tarik ba khatduh ban thep kyrteng.
Ki tyllong khubor ki ïathuh ba ki 3 tylli ki kyrteng kiba dang bishar bniah ki long: James P.K. Sangma, Myntri barim bad uwei na ki nongïalam ba rangbah ka seng na Ri-lum Garo; Bah H.M. Shangpliang, MLA barim ka Mawsynram bad nongïalam ba rangbah ka NPP; bad u Bah Hamletson Dohling, Myntri bad MLA barim ka Mylliem.
Ki nongpeit pyrman saiñ pyrthei ki ngeit ba ka NPP ka don ha ka kyrdan kaba biang ban bat ïa ka shuki ba marwei sha ka Rajya Sabha, haba buh jingmut ïa ka jingkhlaiñ haba phai sha ka jingkheiñ ha ka jingdon jong ki dkhot ha ka Ïingdorbar Thawaiñ ka Jylla.
Kumba ka long hi mynta, la ïohi ba u James Sangma u dei uba hakhmat eh haba phai sha kane ka thong – uba dalade hi u la pynpaw ïa ka jingkwah ban mihkhmat ïa ka Meghalaya ha Rajya Sabha, lada ka seng ka pynïeng ïa u.
Ka NPP ha Ri-lum Garo ruh ka kyrshan ban phah ïa u James Sangma sha Rajya Sabha, da kaba ban jur halor ka jingdonkam ban don ïa ka sur kaba sawa bad ba skhem ha Parliament.
Ka kyrteng u Bah Himalaya Muktan Shangpliang ruh ka la mih ha kine ki por ba la dep. Katkum ki tyllong khubor, ki jingïalang ba ha khlieh duh ki la dep ban long hapoh ka seng ha ryngkat ka jingmynjur kaba nang kiew bad kaba noh sha u Bah Shangpliang.
Ha kawei ka liang, u Bah Hamlet Dohling, uba dei ruh u Myntri barim, u dei uba dang shen ban rung sha ka thup kyrteng kaba la sawa shane-shatai.
Shuh shuh dang shen, u nongaiktien ka Sorkar MDA, u Bah Wailadmiki Shylla u la kubur ba 4 ne 5 tylli ki kyrteng ki la wan shakhmat na ka bynta ka shuki sha ka Rajya Sabha hynrei u la pyntikna ba ïa ka rai haba ïadei bad kane, yn dang hap ban shim.
