Shillong, Jymmang 31
U Bah Aristotle Rymbai, President ka Meghalaya SSA School Teachers Association (MSSASTA) u la ong ba um pyrshah ïa ka jingphah ïa ki nonghikai ban leit kheiñ census, namar kadei kaba la don ha ka aiñ.
“La ñiew ïa ki nonghikai kum kiwei na kiba hap ban pyndep ïa kane ka aiñ, la kadei ka census ne ki ilekshon ruh kumjuh,” la ong u Bah Aristotle haba kren sha ki lad pathai khubor ha Shillong Press Club ha ka sngi Saitjaiñ jong ka taïew.
U Bah Aristotle u la ong ba ka census, kadei shisien 10 snem bad ka ilekshon kadei shisien 5 snem, kumta ha u, u sngew ba kum ki nongshong shnong ka Jylla bad kum ki nonghikai, um sngew pyrshah ïa kane, namar ba kadei hi ka kamram ki nonghikai ban pyndep ïa ka.
Namarkata, u la kyrpad ïa ka Sorkar ba kam dei ban pynbunkam palat ïa ki nonghikai, namar ba ha kane ka por dang don ki exam bad kyrpad ruh ïa ka Sorkar ba kan pynkynriah shuwa ïa ka tarik.
“Kane ka ban hap kheiñ census, kam dei kaba ki nonghikai kin hap leh man la u snem, hynrei kadei shisien ha ka 10 snem. Kum ki nonghikai ngim ong ba haduh katta-katta ban pyrshah halor kane, namar kadei hi ka kamram ba hap ban pyndep ïa kane,” la bynrap u Bah Aristotle.
Shuh shuh u la ong ba da ka jingshimti jong ki nonghikai ïa kane ka kam, kan long ka kam kaba janai. Haba jubab halor ki jingkylli ba ka don jingeh ne-em ïa ki nonghikai u Bah Aristotle u ong “Ngim don jingeh ban pyndep ïa kane ka kam”.
