Shillong, Jymmang 31
U Bah Prestone Tynsong uba dei u Symbud Myn-tri Rangbah u la ong ba ka jingkren jong u ban phah shong ïa ka UDP hajrong tnum bos ka dei tang ka jingsiat pharshi ha ka por ilekshon, hynrei kane ka la pynkynmaw biang ïa u haba uwei u nongkyrshan ka UDP u Bah Charles K Thabah u la phla ba ki nongkyrshan ka UDP ki sngew jynjar palat ban shong ha tnum bos bad dei na kane ka daw ba ka kynhun jong u kaba ju kyrshan ïa u Bah Synshar Thabah, ki la hap ban leit ban pynïasoh sha ka NPP.
Kane ka jingpynpaw u Bah Charles K Thabah ka dei haba ai jingkren hadien ba u la rung sha ka NPP ha ka sngi Saitjaiñ ha Sohiong kaba dei ka sngi ba u kyrtong ka NPP u Dr. DRL Nonglait u la leit ban pan jingkyrshan ha kane ka ilekshon shiteng samoi jong ka MP Lok Sabha kaba la long ha ka 30 tarik Jymmang 2026.
U la ong ba ha ka por ilekshon dei ma u, uba hakhmat ban kynthoh ïa ka NPP hynrei kat dang ïaid ki sngi ki por u la leit kyrshan noh ïa u Bah Samlin Malngiang.
U la ong ba ha ka jingïalap ilekshon ki don ar bynta kaba nyngkong ban kyllan umphniang ïa u kyrtong lajong bad kaba ar ban kawang ktieh ïa kiwei ki kyrtong.
Ha kane ka sngi la ïoh jingkren na u Bah Samlin Malngiang uba dei u MLA barim, u Bah Hamlet Dohling uba dei u Working President ka NPP Meghalaya unit.
Katba u Dr. DRL Nonglait u la ong ba u dang dei u President ka Khasi Authors’ Society (KAS) bad un dang bteng ban ïakhun ban kyntiew ïa ka ktien Khasi namar mynta ïa ki kam jong ka seng u la aiti shipor sha u Vice-President.
