Shillong, Jymmang 31
U MLA barim u Bah PT Sawkmie u la pynpaw ba ki don ki khun ba ki sngew sarong ba u kpa jong ki u dei u pilot, kaba ki ju khot ha ki por mynshuwa, kaba mut u nongñiah uba ki ju tip mynta.
U Bah Process u la pynpaw ïa kane ha ka sngi ba u pynhap pyrda ïa ka jingrakhe Jubili Rupa jong ka Motphran Autorickshaw Owner’s and Driver’s Association (MARODA) kaba ki la pynlong ha National Dorbar Hall, Mawkhar.
U Bah Process u la pynpaw ba une u nongñiah u la lah ban pynnang pynstad ïa la ki khun, ban long ki ophisar bad kiwei ki kyrdan heh ha ka jingim jong ki. Ha kajuh ka por u kyntu ruh ïa baroh ki nongñiah kali jong ka MARODA ba ki dei ban long kiba leh khuid bad ba kamai la ka hok.
Hashuwa kane, kum u kongsan u la noh synñiang ruh sha ka MARODA kum shi bynta ban ïarap lem ïa ka jinglut jingsep jong ki.
Ha kane ka sngi la ïoh ïa ka jingrwai na ki nongñiah auto bad ïa ka jingrwai bad ka jingphawer na u Akbar bad ka kynhun, kiba la pynshongshit ïa kane ka sngi.
Ha kajuh ka por la ïoh ïa ka jingkren pdiang sngewbha na u President ka MARODA Bah Evandul Marbaniang, kumjuh na u Bah Sairos Diengdoh, ba la ïathuh lyngkot kumno ba la seng ïa ka MARODA, la ïoh ruh ban pule ïa ka kaiphod jong ka seng na u Bah T Sawian, Vice President ha ka jingdon ryngkat ki nongñiah kali ka MARODA bad kiwei kiwei.
