Shillong, Jymmang 31
U Myntri ka Koit ka Khiah ka Sorkar Jylla, u Bah Wailadmiki Shylla, ha ka sngi Saitjaiñ u la pynshai paidbah halor ka jingmih ka jingkynnoh ba la don ka jingpynphai biang ïa ki Dawai (Recall of Medicine), kaba u la ong ba ym shym la don kano-kano ka jingjia kaba khraw ha kaba ïadei bad ki Dawai ba la sam da ka Meghalaya Medical Drugs and Services Limited.
Haba jubab ïa ki jingkynnoh na ki Doktor halor ka jingpynphai biang man la ka por ïa ki dawai na ki jaka sumar paidbah, u Bah Wailad u la ong ba kine ki jingjia ki long tang katto katne bad bunsien kine ki jingjia ki mih na ka jingbym buh hok ïa ki dawai ha ki jaka sumar.
U Myntri u la ong ruh ba man ka por ba ki Doktor ki pyntip ïa kano-kano ka jingbym ïahap ha ki dawai, la shimkha mardor ïa ki sienjam bad la weng noh ïa kita ki dawai khlem pynslem.
U la pynshai ruh ba ka jingpynphai ïa ki dawai dang shen ïa ki Iron bad Folic Acid tablets kam shym la ïadei bad ka jingthied dawai jong ka MMDSL, hynrei ka ïadei bad ki dawai kiba la phah beit da ka Ministry.
U Bah Wailad u la ban jur ba watla ki don katto katne ki jingeh kiba malu mala kiba lah ban mih na ka jingthied bad jingsam dawai, hynrei ym shym la don kano-kano ka jingjia kaba la ktah ïa ka jingshngaiñ ki nongpang.
