Shillong, Jymmang 31
Ka Kong Grace Mary Kharpuri, MDC ka Nongshken Konstitwensi, ka la kynthoh jur haba ïadei bad ka jingshah ïalam bakla ha ki rynsan social media, kaba la pynthame ïa ki paidbah ha ka por ilekshon.
ïa kane ka Kong Grace ka la kren ha ka jingïalang ïalap ilekshon ïa u kyrtong MP ka National People’s Party (NPP) u Dr. DRL Nonglait, kaba la long ha ka Saitsohpen, Sohra.
“Ka jingjop ilekshon ha kine ki sngi, lyngba ka rynsan social media kam dei shuh lyngba ka jingjop na ka jingjied shemphang, hynrei la shu jied matlah da ki vote, namar u paidbah u la shah ïalam bakla bad shah pynthame ha ka social media,” ka la ong.
Ka Kong Grace ka la ong ba ki paidbah teng-teng kim sngewthuh shuh haduh ba ki la shu shah pynthame kulmar ha ka social media.
Ka la ong, “Watla ka Sorkar ka la leh shibun ki kam kiba bha hynrei la shu beiñ naphang. Ha ka jingshisha haba u briew u leh bha, ki dei ban ai burom ruh ïa u”.
Ka Kong Grace ka la ther tyngeh da kaba ong, ba tang namar ba kim ïahap na kano-kano ka jingleh ka Sorkar, hato ka long mo ban shu khot ïa u paidbah, ban ïalam sha surok, sha lynti sha syngkien. Kum ki nongïalam ka don ka Dorbar Thawaiñ ban ïasaid ban ïathew, ym ha surok ne ha madan, ban shu pynkulmar ïa ki paidbah.
“Ka jingjied matlah ïa ki nongïalam kan long kaba mynsaw ïa ka jaidbynriew,” la ong ka Kong Grace.
“Hapoh konstitwensi jong nga, ki paidbah ki la lynga, ba haduh kat mynta ki por tang kawei ka skhim ruh kim pat ïoh. Ka skhim kaba sah ruh ngim pat lah ban ïoh. Kane keiñ ngan ong ïaphi, to pynshong nongrim bha, namar da jied matlah yn sa dkoh lut ki kam ki jam,” la bynrap ka Kong Grace.
Namarkata, ka la ong sha ki paidbah, ba long kiba sngewnguh, long kita ki ban siew kylliang da kaba bha na ka bynta kiba la leh bha bad ym dei ban siew kylliang da kaba sniew.
Kumta ka Kong Grace ka la kyntu sha ki paidbah, ba kin sngewbha ban trei shitom na ka bynta u kyrtong, namar ba ka jingjied ilekshon MP mynta, la long kumba kam dei shuh ka jingjied kum ka MLA ilekshon. U MP u don la ka jong ka bor, la ka jong ka bor, ban mih khmat na bynta ki paidbah.
