Shillong, Jymmang 31
Ki nongrep Synsar ba na kylleng ka Ri-Khasi ki pynpaw ba ki ïakynduh jingeh shibun namar ka jinghiar dor shaba palat jong u Synsar bad kynnoh ba tang shisnem treikam ka CM Assure skhim.
Haba ïoh ban ïakren ïa ki katto katne ki nongrep Synsar ba na ka thaiñ Syntung ki la pynpaw ba u Synsar mynta u snem u la hiar dor shaba palat haduh ba kum ki nongrep kim sngewdon jingmyntoi shuh ban rep. Ki la ong ba ka dor Synsar mynta u snem ka ïaid tang 50 tyngka ne tam ha ka shi kilo bad kane ka dor ka kylla man ka sngi ka hiar ka kiew.
Haba pynpaw haba ïadei ka CM Assure skhim ba ka Sorkar Jylla ka la sdang ha u snem ba ladep, da ka jingthmu ban ïarap ïa ki nongrep haba duna dor ki mar rep ha ka ïew ïadie ïathied, Ki nongrep ki la pynpaw ba ha ka snem ba la dep ki la sngewsuk bad ka kham pynmyntoi ruh shibun, namar ka dor ruh ka kham heh, ki nongthid ruh ki wan shim hi ïa u mar na ki shnong jong ki bad kaba pynsuk shibun ka dei ba ka pisa ruh ka poi ha ki ‘Bank Account’ jong ki nongrep, hynrei ki la pynpaw ka jingsngew diaw ba kane ka skhim jong ka Sorkar, ha une u snem ba mynta ba hiar bha ka dor u Synsar kane ka skhim ka la jah bad khlem treikam shuh.
Haba ïoh ïakren ïa ki katto katne ki mahajon ha ka ïew Synsar ha Mawïong ki la ïathuh ba ka dor jong u Synsar ha u snem ba la dep ka long haduh shispah tam ha ka shi kilo, katba mynta u snem ka la hiar haduh 50 tyngka shi kilo, ki la ïathuh ruh ba dor Synsar mynta snem ka shong katkum ka jingbha u mar, u ba ha ka kyrdang ba nongkong, ki thid ha ka dor 50-55 tyngka shi kilo, u ba la kham heh kham ïaw (kyrdan ba ar) ha ka dor 40-42 bad u ba lai pat ha ka ka dor 30 tyngka shi kilo.
Ki la ïathuh ba kane ka jinghiar dor u Synsar ha ka Jylla ka dei namar ba ka duna ka jingdawa lane ka jingdonkam bad kdew ba kane ka jingeh kam dei shuh ba shah ktah tang ki nongrep, hynrei ka la pynkulmar jingmut bad pynkynduh jingeh ruh ïa ki mahajon ba pynïaid ïa ka ïew Synsar.
