New Delhi, Naitung:
Ka India, ha ka 29 tarik u Jymmang, ka la ong ba baroh ki bar jylla kiba la shahñiew beaiñ kiba sahkut ha katei ka ri, yn leh tyngeh katkum ka aiñ, katba ka la kdew ba ka jingpynshisha ïa ka jinglong trai ri jong ki na Bangladesh, ka dang sah ha ki hajar tylli ki jingjia, kiba ïadei bad ka jingshah beh shnong.
Haba kren sha ki lad pathai khubor, u nongaiktien ka Ministry of External Affairs u Randhir Jaiswal u la ong ba ka India ka la dep ban phah palat 2,680 tylli ki mukotduma sha Bangladesh na ka bynta ban pynshisha ïa ka jinglong trai ri jong kine kiba la shah ñiew ba ki la rung beaiñ sha India.
“Baroh ki trai jylla be-aiñ kiba sahkut ha India yn leh katkum ka aiñ, ha kaba ïadei bad ka Bangladesh ngi la phah palat 2,680 tylli ki mukotduma sha ka liang ka Bangladesh ban pynshisha ïa ka jinglong trai ri”, la ong u Jaiswal.
U la pynpaw ba ka jingpynkynriah ïa ki trai ri Bangladesh kan ïaid shakhmat ynda la dep ïa ka jingpynshisha da ka ri ba marjan.
“Ynda la dep ïa kane ka jingpynshisha ïa ka jinglong trai ri, ngin sa don ha ka kyrdan ban beh noh ïa kine ki trai ri ka Bangladesh,” u la bynrap.
U Jaiswal u la ong shuh shuh ba katto katne kum kine ki jingkyrpad ban pynshisha ki dang sahkut la palat san snem bad u la pynpaw ka jingkyrmen ban ïoh ïa ka jubab kaba kloi na ka ri Bangladesh.
“Ha kiba bun ki khep, kine ki jingpynshisha ki dang sahteng mynta la palat san snem. Ka long ka jingkhmih lynti jong ngi ba ngin sa ïoh ïa ka jubab kaba kloi na ka ri Bangladesh khnang ba, hapoh ka jingïapynbeit arliang hapdeng ki ar tylli ki ri, ïa kine ki briew yn lah ban pynphai biang sha Bangladesh,” u la ong.
Kane ka jingkren ka wan hapdeng ka jingpynleit jingmut kaba jur ha ka saiñ pyrthei bad ka synshar khadar halor ka jingwan rung be-aiñ bad ki kam pynïaid khappud ha ki katto katne ki jylla jong ka thaiñ Shatei-lam-Mihngi, kynthup ïa ka Assam bad Tripura.
