Shillong, Jylliew 01
Ka Khasi Hills Auto-nomous District Council (KHADC) hapoh ka jingïalam ka Voice of the People Party (VPP) ha ka 01 tarik u Jylliew 2026, ka la khot ïa ka ‘hearing’ na ka bynta ki khun ki hajar ka Hima Langrin ban ïakren halor ka kam thung syiem ha katei ka Hima.
Kane ka jingkhot ka District Council ïa ka ‘hearing’, kadei hadien ba ki khun ki hajar ka Hima, ki la ai da ka jingthoh sha u Chief Executive Member (CEM), ban khot da ka ‘hearing’ ban ïakren halor ka kam Syiem ha ka Hima. Na ka District Council, la ïalam da u Bah Powell Sohkhlet EM bad ha ka jingdon lang ruh kiwei-kiwei ki ki EM bad ki nongïalam ba hakhmat jong ki khun hajar ka Hima.
Haba kren sha ki lad pathai khubor, u Samla Wadlad u la ïathuh ba ka ‘hearing’ mynta ka long ban ïakren bad ka KHADC, ban pyllait noh ïa ka kaiphod jingtohkit ïa u Nongtei Sing Syiem-ïong, u Syiem ka Hima Langrin uba la shah sospon ha u snem 2023.
“Ki khun ki hajar ka Hima Langrin ki la kyrpad ïa ka EC KHADC, ba kan pyllait noh ïa ka kaiphod halor ka jingtohkit ïa u Bah Nongtei Sing Syiemiong, khnang ban ïoh pynlong ïa ka jingjied Syiem thymmai hapoh ka Hima,” u la ong.
U Samla Wadlad u la kdew ruh ba ka jingshah sospon ïa u Bah Nongtei Sing Syiemïong, kadei na ka jingbym shaniah shuh ki khun ki hajar ka Hima, kiba la mudui pyrshah ïa u ha ka 05 tarik u Naitung 2023, halor ka jingleh donbor ïa ka Hima, ki jaka puta, ka jingpyndonkam bakla ïa ka pisa ka Hima, ka jingbymshai ïa ki jingmih ka Hima ha ka jinglut, ba la ai sha ka Council, ka jingbym thung ïa u PIO bad ka jingpynduh ïa ki hok jong ki khun ki hajar ka Hima.
“Ka District Council kadei ban pyllait noh ïa ka kaiphod jingtohkit ïa u Syiem ba la shah sospon, khnang ban wanrah noh da ka ilekshon ha ka Hima, ban wanrah biang ïa ka shongsuk shongshngaiñ,” la ong u Samla Wadlad.
Nalorkata, u la ïathuh ruh ba ki don palat hajar ngut ki shynrang ba 18 snem shajrong, kiba la buh ka jingmudui pyrshah ïa u Nongtei Sing Syiemïong. Kane ka paw shai ba ki khun ki hajar ka Hima, kim shym la shaniah shuh ïa u ne u Syiem halor ki kam ba u trei bad kiba la kwah ban ïoh noh da u Syiem ba thymmai.
“80% na ki nongthep vote Syiem kiba la mudui pyrshah ïa u Nongtei. Haba baroh ki khun shynrang jong ka Hima ki la dep ban mudui pyrshah ïa u, kaba mut ba kam don shuh ka jingshaniah. Ngi dawa ba ka Council, kadei ban wengnoh ïa u kum u Syiem ba rangbah bad ban wanrah noh da ka ilekshon,” la bynrap u Samla Wadlad.
