Shillong, Jylliew 01
Ar ngut ki shipara ki la duh noh ïa la ka jong ka jingim, hadien ba ki la shah rong noh ha ka um ha wah Umramai, ha ka shnong Myrjai ha West Jaiñtia Hills. Kane ka jingjia ka dei kaba la jia ha ka 30 tarik Jymmang, 2026 ha ka por kumba 2 baje nohphai sngi, ha ka por ba ki la leit ban sait jaiñ.
Ha katei ka jingshah rong um la don lang kawei ka khynnah 15 snem kaba dei shi para ar kmie bad kitei ki ar ngut ki shipara kata ka kynthei kaba dang 9 snem bad u shynrang ba dang 8 snem ka rta.
Katkum ka khubor la ong ba ha ka por ba dang ïa sait jaiñ, ka la wan kynsan ka um kaba heh bad rong ïa ki baroh lai ngut tangba katei ka kynthei kaba la 15 snem namar ba ka la kham sian bad khlaiñ ka la ksaid sharud um ha kaba la wan ïarap ruh da kiwei kiba don marjan.
Hynrei ïa kitei ki heprit baroh ar ngut ym shym la lah ban ïarap ïa ki bad ka um ka la rong noh ïa ki. Hadien kane, la pynlong ka jingwad ïa ki hynrei ha katei ka janmiet ym shym la lap ïa ki.
Dei tad haduh ka sngi U Blei ka 31 tarik u Jymmang, 2026 la lap shwa ïa ka metïap i heprit kynthei bad ïa ka metïap u heprit shynrang la lap ha ka step 1 tarik u Jylliew, 2026. Nalor ki nongshong shnong la wan ïarap wad ïa kitei ki heprit da ka kynhun pulit bad na ka Search and Rescue Team, Fire and Emergency Service na katei ka District.
Namar ki bahaïing ki shim ba ka dei ka jingjia sniewbok bad kaba ym poi pyrkhat kumta la pyndep ïa ka lehniam bad tep noh ïa ki met basah jong ki shipara ha ka nohphai sngi 01 tarik u Jylliew, 2026.
