Shillong, Jylliew 01
Ka jingwan ka roi ka par, kum ka surok bad ki lynti ki syngkien ka dei na ka bynta ka jingmyntoi jong u paidbah nongshong shnong, hynrei na ka jingwan ka roi ka par ka don ruh ka jingduh jingmyntoi namar ki don ki katto katne ki jingktah.
Ka jingpyntrei ïa ka surok NH-40 Shillong-Dawki kaba la ïaid mynta la katto katne snem, ki la mih kiba bun ki jingshah ktah namar ka jingpyntrei ïa katei ka surok, kawei na ki jaka ba la long trai na ka Kur ka jait Syngkrem kaba don harud jong ka Wah Umngot East Khasi Hills District bad mar pyrshah ka shnong Darang ka la shah ktah na ka daw ka jingtuid ka khyndew, ki maw na ka jingpyntrei surok.
Kane ka jingtuid ki maw, ka khyndew ka la pynjulor bad rat naphang ïa ki kper kwai, kper tympew jong ki bad tap khyndew ïa ki ‘Homestay’ lane ki jaka sah miet ki nongwan jngohkai pyrthei harud jong ka Wah Umngot.
Ka Kong Unit Syngkrem lem bad ki bahaïing hasem jong ka, kiba long trai ïa ka jaka (Bri Kwai bad Tympew) kumjuh ki ‘Homestay’ ki la kynnoh ba ka jingpyntrei ka kompeni ïa katei ka surok ka la ktah bha ïa ki bri kwai, bri tympew ki jong ki, kumjuh ruh kaba buh jingma ruh ïa ki ban leit bri, leit rep bad ha ka shong ka sah ka jong ki, da kaba kdew ba ym lah ban tip ïoh wan ka khyndew ne ki maw ha kano-kano ka por.
Shuh-shuh ki la ïathuh ba ka kam jngohkai pyrthei lyngba ka jingwan ki nongsah kai ha ki ‘Homestay’ ka dei kawei kaba ai kamai ïa ki, hynrei kim nud shuh ban pynsah briew namar ka jingtyllun ki maw bad ka khyndew kaba buh jingma shibun bad pynpaw ba ki la hap ban shu khang khyrdep ïa ki ‘Homestay’ ki jong ki. Namar kata ki la pynpaw ba ki la duhnong bun bha bad ki la dawa ba ka Sorkar ka dei ban siew ïa ka bai lut ksan.
Haba ïoh ban ïakren ïa u Bah Kitbok Ryngksai Secretary Shnong Darang u la ïathuh ba ha shuwa ban wan katei ka jingpyntrei surok ki trai jaka ki la leit sha ka jingpynshai ba kan ym don kano-kano ka jingshah ktah na ka jingpyntrei ïa ka surok, katba haba la sdang ban trei, ki trai jaka ki la duh ïa ki jingthung jingtep ki jong ki.
U la ïathuh ba haba ïadei kine ki jingshah pynjulor, u Myntri Nongrum jong ka Hima Khyriem ki la leit ban ujor sha ka ophis u SDO ka Pynursla Civil Sub-Division, hynrei haduh mynta kam shym la don kano-kano ka jingjurip lane ka jingjubab kaba bha haba ïadei katei ka jingjia.
