Mairang, Jylliew 01
Ka District Magistrate (DM) jong ka Eastern West Khasi Hills District, Mairang ka la pynjari da ka kyndon aiñ kaba 163 BNSS, 2023 ban nym shah ïano ïano ban pynïeng kali harud ka surok National Highway 44E ha ka por ba pynlong ïa ka jingïakop khwai bad lucky draw ha ki jaka kiba hap hapoh ka district.
Ha ka kyrwoh khubor ba la phah, ka District Magistrate kala ong ruh ba ka jingrung bad ka jingmih jong ki kali na ki jaka pynïeng kali ba la pynbeit da ki nongpynïaid ïa ka jingïakop khwai bad lucky draw, kam dei ban pynthud ïa ka ïaid ka ïeng jong ki paidbah nongleit nongwan bad kam dei ban pynthud ïa ka jingïaid beit jong ki kali ha ka surok National Highway.
Shuh shuh kala ong ruh ba kane ka aiñ la pynjari hadien ka jingjia dheng kali kaba la neh da ki lai bad saw kynta ha ki bynta jong ka Kynshi – Mawlangren kaba don harud ka surok National Highway 44E tang na ka daw jong ka jingpynïakop khwai dohkha bad lucky draw ba la pynlong ha katei ka jaka.
Ka kyrwoh khubor ka ong ruh ba kane ka jingdheng kali ka la ktah bad pynthud ïa ka leit ka wan jong ki paidbah nongleit nongwan bad ruh ka la pynthut ïa ka jingïaid beit jong ki kali.
Ka District Magistrate kala ong ruh ba na ka liang ki nongpynïaid ïa kum kine ki jingïakop kim shym la lah ban bud ryntih ïa ki kyndon ba la buh bad bthah ïa ki ban leh da ka ophis jong ka Deputy Commissioner, Eastern West Khasi Hills District, hynrei la ong ruh lada don kiwei pat kiba kwah ban ai jingmut bad pynbeit ha kaba ïadei bad kane hukum, ki lah ban leit mih sha ka ophis jong ka Deputy Commissioner, Eastern West Khasi Hills District.
