Shillong, Jylliew 01
Ka North-Eastern Hill University Non-Teaching Staff Association (NE HUNSA) ka la kyrpad na ka tnad pule-puthi ka Sorkar Pdeng ban pynkloi haba ïadei bad ka jingthung ïa u Vice-Chancellor (VC) bathym -mai, da kaba ong ba ka jingpynbna na ka bynta katei ka kam ka long kaba la ap khmih lynti da baroh, hynrei ka la dei ban wan kham hashuwa haba kheiñ ïa ka “jingeh kaba dang ïaid sha-khmat” ha ka skulbah.
Ha ka shithi sha u Secretary, MoE ha ka Lah Sngi U Blei, ka NEHUNSA ka la ong ba “ka sngewnguh bad pdiang sngewbha ïa ka jingpynbna kaba la ap khmih lynti na ka bynta ka kam Vice-Chancellor ha NEHU,” da kaba kdew ba “ka jingkhmih lynti ïa ka jingpynbna la dei ban leh kham hashuwa” namar “ka jingbymlah treikam ba la pyni da u Prof. P.S. Shukla.”
Ka seng ka la kynnoh ïa u Prof. Shukla ba u la “jied mon sngewbha ban iehnoh ïa ka jaka treikam jong ka skulbah ha Shillong,” katba u “pyrshang katba lah ban tuklar na jngai (na ka jaka kaba jngai) ha ka liang ka pule-puthi bad ka jingpynïaid kam.”
“Kum ka seng kaba la ih bha, ka NEHUNSA ka la pynpaw ïa ka jingngeit kaba pura ha ka tnad Pule Puthi ka Sorkar Pdeng, ba naduh kane ka por ba mynta, yn thung ïa u Vice-Chancellor uba la tbit bha – ha ka liang ka pule-puthi bad ha ka liang ka jingpynïaid kam ha ka rukom kaba khuid ba suba,” ong ka shithi.
Ka NEHUNSA ka la ban jur halor ka jingpynkloi haba ïadei bad kane ka bynta.
“Ka seng ka khmih lynti ban pyndep kloi ïa ka rukom thung kam, la kumno-kumno hashuwa u Nailar, 2026, khnang ban lait na kano-kano ka jingbym don nongïalam,” la ong ka kyrwoh.
Halor ka jingkylla, ka kynhun ki nongtrei ka la ong ba dei ban bud ryntih ïa ki kyndon jong ka skulbah.
“Kan long kaba sngewkmen ba ïa ki ‘Act’ bad ‘Statute’ jong ka skulbah la burom ha ka rukom ba, ynda la kut ka samoi kut treikam jong u Prof P.S. Shukla kum u Vice-Chancellor, u Professor ba rangbahduh un shimti ïa ka kam kum u Acting Vice-Chancellor jong ka NEHU,” ong ka shithi.
Shuh shuh ka seng ka la maham pyrshah ïa kano-kano ka jingpynjlan ïa ka samoi treikam jong u VC ba mynta.
“Kano-kano ka jingpyrshang ban pynjlan ïa ka samoi treikam jong u Prof. P.S. Shukla kan sa paw ba kan long kaba ktah jur ïa ka jinglong-jingman baroh kawei jong kane ka skulbah,” la ong ka NEHUNSA.
