Shillong, Jylliew 01
Ki runar kiba ym lah ban ithuh, ki la iehnoh shadien ïa ki masi bad ban phet krad noh na ka jaka, hadien ba ki la ïohi ïa ki shipai BSF kiba ïaid pahara.
Katkum ka khubor na ki pulit la ong ba ki shipai BSF jong ka BOP Pyrdiwah ki la ai ka jingujor ba ha ka 28 tarik Jymmang, 2026 ha ka por kumba 11.45 mynmiet, ki shipai BSF ki la ïohi ïa ka jingdon jong ka jingïaid jong ki briew bym lah ban ithuh ha ki bynta jong ka khlaw kaba don ha lynter jong ka BP NO. 1272/5-S.
La ong ba ha kane ka por, haba kine ki runar ki la ïohi ïa ki shipai BSF, ki la phet krad noh na katei ka jaka. Kham hadien haba la pynlong ïa ka jingkhynra, ki shipai BSF ki la lap ïa ki masi kiba la ieh na katei ka jaka, ïa kiba la thmu ban shalan tuh sha Bangladesh.
Ha kawei pat ka khubor, ka Kong Regina Suphai ka la ai ka jingujor ba ha ka 19 tarik Jymmang, ha ka por kumba 1 baje mynstep, ki runar bym lah ban ithuh, ki la tuh ïa ka masi na ka sem masi jong ka, kaba hap hapoh ka Mawlasnai OP (Ri-Bhoi).
Kane ka nongujor ka la suba jur ba uwei u briew ba la tip kyrteng kum u Ton Shadap u la donkti ha kane ka kam bad ban pynïap ïa kane masi ha ka 23 tarik Jymmang ha ïew Tyrso.
