Shillong, Jylliew 01
Ki para ba ïatreilang ha ka jaka die shyiap ha Demthring, ha ka step jong ka 01 tarik u Jylliew, 2026, ki dang bteng ban wad ïa u Ebenezer Laloo, uba jah rngai naduh ka janmiet 30 tarik u Jymmang, 2026, ha ki bynta ka Madanriting Block-B.
U Ebenezer u dei uba ñiah kali kit shyiap ha katei ka jaka bad la ong, ba dang ha ka 30 tarik u Jymmang, 2026, u dang wan phai na la shnong na Tamu, Namdong, West Jaiñtia Hills District sha katei ka jaka trei.
La ong ba u khlem wan trei bad u don bad la ka kurim ha ïing jong u ha katei ka sngi.
Katkum ki khubor ba la ïoh lum la ong, ba ha ka por janmiet kumba ha ka por 7 baje, la don ka kynthei kaba wan wad ïa u ha katei ka jaka die shyiap bad pan phone na u trai katei ka jaka die shyiap bad kren ïa u Ebenezer.
Mar kumta u Ebenezer u la ong ïa la ka lok ba un leit sha Mawblei.
Ka dei pat ha ka por 7 baje eiei, u wei na kiba ïatreilang u la ïoh pdiang ïa ka phone call na u Ebenezer bad haba la jubab pat u Ebenezer um kren ei-ei bad shu ïoh sngew ïa ka sur kynthei kaba ong ‘shoh eh bad dat eh’.
La suba ba u Ebenezer u shah shoh bad ha katei ka por u la khem kulmar ïa ki number phone bad poi phone sha u tei uba ïatreilang.
Ki para ba ïatreilang ki la pyrshang phone biang ïa u hynrei la shem ba ka phone jong u ka la switch off.
Hadien kane ki la pyntip sha ka kurim jong u, bad mar-mar ki la leit wad ïa u bad haba kim lap ki la leit mudui ha Madanriting Police Station.
Hynrei ha ka 31 tarik u Jymmang, 2026, la wan u hynmen jong ka kynthei, kaba wan wad ïa u Ebenezer ha kaba u la pyntip ba ka la don ka jingshah shoh u Ebenezer ha Madanriting Block-B ha ka janmiet ba la dep.
Na kane, ki pulit ki la rah tohkit ïa ki katto-katne ngut ngut ki briew bad haduh mynta ki dang wad ïa u Ebenezer, ha ryngkat ki bahaïing, ki para ba ïatreilang.
