Shillong, Jylliew 01
Ki kam tuh kam thiem ki dang ïai bteng na kawei ka sngi sha kawei pat ha kylleng ki bynta jong ka nongbah Shillong bad sha kiwei pat ki jaka bad ïa kine lah ban sakhi na ki jingjia shah tuh kiba dang shen.
Katkum ka khubor kaba la ïoh na ki pulit la ong ba u Hrishikesh Sunar u la ai ka jingujor ba ha ka miet jong ka 28 tarik u Jymmang, 2026, ki runar bym lah ban ithuh ki la pynpait ïa ka kynroh jong ka kamra sum jong ka Cottage No. 23 ha phyllaw jong ka Shillong Club bad ban tuh ïa kiba bun ki tiar ba pyndait hapoh kane ka kamra.
Ha kawei pat ka khubor, u Security Officer In-Charge, NEHU, Shillong, u la ai ka jingujor ba ha ka 29 tarik Jymmang, 2026 ha ka por kumba 10.30 mynstep, ki runar bym lah ban ithuh, ki la prong tuh hapoh ka ophis jong ka NEHUTA kaba don ha NEHU Campus, Shillong bad ban tuh ïa ar tylli ki electric kettle, lai tylli ki halogen heater, kawei ka printer, kawei ka CPU, kawei ka UPS, ar tylli ki water taps bad ar tylli ki OVC pipes, kiba baroh ki la shongdor kumba T.64,500/-.
Na ka liang jong ka Kong S Kharbuli ka la pyntip ha ka 29 tarik Jymmang, 2026 ba ki runar bym lah ban ithuh ha kawei ka arshaka, kaba don ïa u registration number ML05-AG-7429 ki la leit sha ka ïingsah jong ka, kaba don ha MUDA Complex, Nongmensong, Shillong, ha kaba ki la shoh ïa u khun jong ka bad ki paralok jong u bad ban phet krad na katei ka jaka.
