Shillong, Jylliew 01
Ka ïingbishar Meghalaya High Court ha ka sngi Nyngkong, kala pynjlan biang ïa ka jingbishar halor ka mukotduma kam bymman bala mudui da ka Jylla pyrshah ïa ka Sonam Raghuvanshi, ka nongshah kynnoh ba hakhmat eh ha ka jingpynïap ïa la u kurim uba dei u nongkhaïi na Indoor (L) Raja Raghuvanshi ha Sohra.
Ïa kane ka mukotduma la buh ban shong bishar ha ka 3 tarik Jylliew hadien ba ym lah ban pyndep ïa ki jingïapynksan nia (arguments). Ïa ka hukum la pynmih da ka ïingbishar u Justice W Diengdoh.
“La sngap ïa u A Kumar, u AG na ka bynta ka Jylla. Ka jingsngap ïa ka jingpynksan nia kam pat dep satia. Buh ïa kane ka kam ban nang sngap shuh shuh ha ka 03.06.2026,” ong ka hukum.
Ha u bnai bala lah, ka ïingbishar Magistrate kala ai bah jamin ïa ka Sonam, hadien ka rai ba ki pulit kim shym la lah ban pyntip ha ka rukom kaba dei ïa ka Sonam halor ki nongrim ka jingkem ïa ka.
Ha ka hukum bala pynmih ha ka 27 tarik Ïaïong, haba pynwai ruh ïa ka aplikeshon pan jamin, ka ïingbishar ka Additional Judge (Judicial) DR Kharbteng kala ong ba ki jingduna ha ka rukom pynïaid ïa ki kam kaba long pyrshah ïa ka riti synshar katkum ka Article 22(1) bad ka lah ban ktah ïa ka nongrim ban ïada ïalade da ka nongshah kynnoh.
Ka ïingbishar kala kdew ïa ki jingdkoh kiba bun kiba lah ban ïohi na ki kot ki sla kiba ïadei bad ka jingkem ïa ka.
Katba ïa ka ejahar ha Sohra PS Case NO 7/2025 la register hapoh ka kyndon 103 (1)/238(a)/309(6)/3(6) jong ka BNS, ka “jingpyntip ïa ki nongrim ka jingkem” bala pynngat ïa ka Sonam la kdew da ka kyndon 403 (1) ha ka jaka jong ka 103(1).
“Haba pule bniah ïa ka Annexure 8….ha katei ka format bala ai ha u nongujor, ym shym la buh kawei ruh ka dak ha ka check box ban pynpaw ïa ki jingpynngat kyndon (charges) pyrshah ïa ka nongujor,” ong ka hukum.
“Wat ki kyndon jong ka aiñ bala kdew ha ka Sohra PS Case No 7/2025 u/s 403(1)/238(a)/309(6)/3(6) BNS.”
Ka Judge kala kyntait ïa ka jingpynksan nia jong u nongïasaid ba ka dei ka jingthoh bakla haba pynkhreh ïa ki kot ki sla, haba pynpaw ba kum kine ki jingbakla kila paw ha kiba bun tylli ki kot ki sla.
