Nongpoh, Jylliew 01
Ka jingpyntreikam na ka bynta ban pynheh bad maramot ïa ka Stage III Power Station kala sangeh noh la kumba shitaiew eiei hadien ba la kynnoh ba ka kynhun sengbhalang kala leit hiar sha katei ka jaka ban talasi ïa ki nongtrei bar Jylla bym don kot don sla da kaba shoh naphang ym tang ïa ki bar jylla, hynrei wat ïa ki para Khasi ruh kiba trei ha katei ka jaka.
Halor kane ka bynta, ki ar tylli ki shnong ba kynthup ïa ka Nongdieng- ngan bad ka Nong-mahir, ki la pynpaw ïa ka jing-sngewkhia kaba jur halor katei ka jingjia kaba la poi shaduh u pud ba kompeni kaba pyntrei ïa katei ka kam, kala hap ban pynsangeh noh ïa ka jingpyntrei naba ki nongtrei bar jylla ki la phet noh na katei ka jaka.
Kane ka jingpynsangeh ïa ka jingpyntreikam ïa katei ka projek, kala ktah bad buh jingeh shikatdei ïa kiba bun ki longïing, ki samla shnong kiba trei bylla ha katei ka projek ban kyrshan ïa ka ïing ka sem mynta la kumba shisnem tam eiei bad ka tulop ba ki dei ban ïoh ruh, kala sahteng noh namar ki heh jong ka kompeni ba pyntreikam, kila phet noh sha la ki shnong ki jong ki.
U Bah Dip Pathaw, Rangbah Shnong ka Nongdiengngan lem bad u Bah J Thangkhiew Secretary Shnong jong ka Nongmahir kila pynpaw ba kim don ïa ka jingpyrshah ïa ki kynhun seng khynra Labour License ïa ki nongtrei bar jylla, hynrei ka dei ban ïaid da ka lynti bad ba na ka liang ka shnong ruh kin ai ïa ka jingïatreilang kaba pura, hynrei kumba long mynta, ka jingleh jong ki, kala poi sha u pud ba la hap ban pynsangeh noh ïa katei ka projek bad wanrah pat ïa ka jingeh ïa ki paidbah nongshong shnong kiba trei bylla ha katei ka jaka.
Kitei ki nongïalam shnong kila pynpaw ba ha kaba nyngkong, ki dap da ka jingkmen ïa ka jingwan jong katei ka projek, hynrei ka jingpynsangeh pat kumne ka la ktah jur naba naduh ba la sdang ban pyntrei ïa kane ka kam, ka um ruh kala rit bad ki nongwan jngohkai ruh kila duna bha, haba ïanujor bad ki snem kiba la dep mynshwa ha ka por ba dang heh ka um.
Kumta na ka liang ka jong ki, ha ryngkat bad ki nongtrei bylla, kila kyntu sha ki bor ba dei khmih ka Sorkar bad ruh ka MeECL ba kin shimkhia ban leh ïa kaba donkam ban ïoh pyntrei biang ïa katei ka projek na ka bynta ka jingmyntoi lang jong baroh ki paidbah.
