Shillong, Jylliew 01
Ki ar ngut ki samla kynthei Khasi na Barato ki la pan jingïarap kyrkieh na ka Khasi Students’ Union (KSU) Delhi Unit myn ha ka 31 tarik u Jymmang 2026.
Ha ka kyrwoh ba la phah da ka KSU ha ka sngi Nyngkong jong ka taïew, la ong ba katkum ka jingïathuh jong ki, la wanrah ïa kitei ki arngut ki samla sha Delhi da kaba kular ba yn pynïoh kam ïa ki ha kawei ka hotel. Hynrei, hadien ba ki la poi sha Delhi, la kynnoh ba la pynbor ïa ki ban rung ha ki kam khaïi met.
Katkum ka jingïathuh jong kine ki samla kynthei, haba ki la kyntait ban leh kumta, ka kynthei kaba wanrah ïa ki sha Delhi, ka la dawa ba kin siew biang ïa ka pisa leit jingleit ba la pynlut na ka bynta jong ki bad ka la knieh ruh ïa ki mobile phone jong ki.
Ki la kynnoh ruh ba ym shah ïa ki ban mih na katei ka jaka, tad haduh ba kin siew biang ïa ka pisa ba la pynlut ha ka jingleit jong ki.
Hadien ba ka KSU Delhi Unit ka la ïoh pdiang ïa kane ka jingïakyrpad jingïarap, mar-mar ka la pyntip sha ki pulit Delhi bad ka la pan jingïarap na ki.
Ki pulit Delhi ki la shim khia ïa kane ka kam bad ki la lap bad bat ïa katei ka kynthei kaba la ïalam lynti ha ka kam sniew na ka bynta ka jingtohkit kaba bniah.
Haba la tohkit ïa ka, katei ka kynthei ka la kyntait ïa baroh ki jingshah kynnoh, ba la mudui pyrshah ïa ka. Ka la ong ba kine ki ar ngut ki samla kynthei, ki la wan hi da ka mon sngewbha lajong sha Delhi ban wad kam, bad ba ka la siew ïa ka bai leit bai wan jong ki ban ïarap ïa ki ban ïoh kam ha Delhi.
La ong ruh ba ka la kyntait ba ka don bynta ha kano kano ka jingpynbor lane jingthmu ban pynrung ïa ki ha ka kam khaïi met.
Hadien ka jingïalam jong ki pulit Delhi, la bthah ïa katei ka kynthei ba kan pynphai noh ïa ki mobile phone jong kitei ki ar ngut. Hadien kata, la aiti noh ïa ki samla kynthei sha ka jingïada bad jingïarap jong ka KSU Delhi Unit.
Ha kane ka por, kine ki arngut ki dang don hapoh ka jingïada bad jingïarap jong ka KSU Delhi Unit. La pynbeit ruh ïa ki lad jingïarap ban pynpoi suk ïa ki sha la ïing.
Na ka liang ki bahaïing hasem jong kawei na ki, ki la phah ïa ka pisa ban siew ïa ka tiket liengsuiñ jong ka, bad ka la buh jingthmu ban leit phai noh sha Meghalaya lashai ka sngi.
Ka KSU Delhi Unit ka dang ïai bteng ban peit bad ïada ïa ka bha ka miat jong ki samla bad ki nongshong shnong na Meghalaya, kiba don ne leit sah shabar ka Jylla.
Ka KSU ha ka kyrwoh ka kyntu ïa baroh kiba wad kam, ba kin long kiba husiar bha haba pdiang ïa kino-kino ki jingkular kam na ki briew bym lah ban shaniah bad ba kin pynshisha bha ïa ka jingshisha jong kine ki jingkular shuwa ban leit sha kiwei pat ki jaka.
