Khliehriat, Jylliew 01
Hadien ba la kut ka kynta treikam jong ki ophis Sorkar, ki pulit jong ka East Jaiñtia Hills District kila kyndang jubor noh ïa u President jong ka Jaiñtia Coal Owner Miners Supplier and Workers Association (JCOMSWA) u Ma Marshall SB Biam ryngkat ki dkhot kiba shong shah thngan hajan u motdur Kiang Nangbah kaba don hapoh ka phyllaw DC ophis.
Ki pulit ka District kila kyndang ïa u Ma Marshall Biam ryngkat ki dkhot ha ka por kumba 6.30 janmiet bad pynmih ïa baroh shabar ka khyrdop jong ka ophis DC.
Shwa kane, ha ka por mynstep jong ka 1 tarik Jylliew, ka Jaiñtia Coal Owner Miners Supplier and Workers Association kala pynlong ïa ka jingïakhih shong shah thngan kaba khlem buh por hajan u mot dur u Woh Kiang Nangbah, kaba don hapoh ka phyllaw jong ka DC ophis, Khliehriat.
Haba kren sha ki lad pathai khubor, u Ma Marshall SB Biam u la ong, kane ka jingïakhih ka long ban dawa na ka Sorkar ban pyllait ïa ka jingtih dewïong hapoh ka Ri-Lum Jaiñtia, khnang ban im biang ka kamai kajih jong ki nongshong shnong ka thaiñ kiba im bad kamai da u dewïong.
U la ong la 12 snem kynthih, ka Sorkar Jylla ryngkat ka Jaiñtia Hills Autonomous District Council (JHADC) kim shym la thaw kino-kino ki lad ki lynti lyngba ki kyndon aiñ ban sdang noh ïa ka rukom tih dewïong katkum ka juk stad kaba lah ban ai kam biang ïa ki nongshnong shnong ka Ri-Lum Jaiñtia kumba long ha ki por mynshwa.
“Ka jingkhang tih dewïong kala ktah naduh u rit u ria haduh kiba don ba em, ka ktah ruh ïa ka kamai ka kajih naduh ki nongkhaïi bad ki nongtrei bylla ban pyndap ïa ka ïing ka sem,” la ong u Ma Biam. Lah ban kdew ba na ka liang ka ophis u DC kam shym la ai jingbit ïa ka Jaiñtia Coal Owner Miners Supplier and Workers Association ban pynlong jingïakhih hajan u mot Kiang Nangbah kaba don hapoh ka phyllaw DC ophis bad kala kyrpad ban ithuh jaka shawei kaba jngai na ka ophis DC.
