New Delhi, Jylliew:
Ka kynhun syntiat jong ka Pakistan, ka Inter-Services Intelligence (ISI), mynta ka pyrshang ban pyndonkam ïa ka saiñ pyrthei ba kongsan kum ka jingpynjah burom ha ki kam lehnoh. Ka kynhun ISI ka la bthah ïa ki nongïarap jong ki lehnoh jong ka Jammu & Kashmir ban rung shapoh ki seng saiñpyrthei riewlum ban buhrieh ïa ka jingpynrung kam lehnoh, ka jinglum pisa bad ka jingpynpoi ïa ki tiar ïaleh.
Ka buit ka long kaba la ñiew tang bha, ha kaba la pynrung ïa ki dkhot ki seng lehnoh ha ki kynhun saiñ pyrthei ban lait na ka jingpeitngor pyrshah ïa ki lehnoh bad pynïaid ïa ki kynhun lehnoh hapoh ka jingtap jong ka jingtreikam jong ka synshar paidbah.
Ïa kane ka jingthmu ba sniew la paw pyrthei ha ka jingtohkit ba dang shen ïa ki nongkyrshan jong ki lehnoh ba la shim da ki pulit ka Jammu & Kashmir.
Ki nongtohkit ki la lap ïa ki kot long dkhot ba kongsan jong ki seng riewlum ha ki pla jong ki.
U DGP barim u S P Vaid u la maham ba kane ka jingthmu ba sniew, haduh katno katno, kan ïada ïa ka kynhun jong ki nongkyrshan ki lehnoh na ka jingshah bishar bniah ha ki bor pahara. “Ka card dkhot ka kylla long ka jingda ha ka por ba talasi,” u la ong. “Ngi la don ki khep ha kaba ki nongïarap ki lehnoh ki pyndonkam bakla ïa ka jinglong dkhot jong ka seng ban kit tiar ïaleh,” u la bynrap.
Kane ka kot pyndonkam kam dei kaba thymmai. Ha ki snem ba kut jong ki snem 1990 bad 2000, ki la don katto katne ki khep ha kaba ki nongkyrshan jong ki lehnoh ki la pyndonkam da ki kot dkhot jong ka seng ban thok ïa ki bor pahara.
Ha u bnai, Naitung jong u snem 2020, ki nongshong shnong ha Reasi ki la kem ïa u Talib Hussein, u lehnoh jong ka Lashkar-e-Toiba ïa uba la shah thwet jur.
La lap ba u Hussein, u dei u dkhot ba trei shitom jong ka seng BJP bad u dei u nongpeit ïa ka Social Media Minority Morcha jong katei ka seng ha Jammu.
La ïoh kurup ar tylli ki suloi AK, katto katne tylli ki Grenade bad kiwei kiwei ki tiar siat bad ki kuli. U la pyndonkam ïa ka jinglong dkhot jong u ban shondur bad ki nongïalam ba hakhlieh-duh jong ka seng, bad kane ka la ïarap ïa u ban ïoh lad ban leit sha ki katto katne ki jaka, haduh ba un da shah kem.
Ha ki por ba la leit, ki lehnoh ki la pyndonkam da ki Voter Card bad ki Aadhaar thok khnang ban lait na ki jingshah pynshitom ha ki pulit.
Ka jingshah pyntroiñ ba dang shen jong ka kynhun ki lehnoh Lashkar kaba dang shen ha Malerkotla, Punjab, ka la pynpaw pyrthei ba kumno ki lehnoh Pakistan ki la treikam ha India da palat 15 snem, ha kaba bun ki la lait na ki jingshah kem bad lait na ka jingkhmih bniah jong ki kynhun pahara bad kynhun ïada ri.
Ki jingïaleh pyrshah ïa ki lehnoh kiba dang shen ki la buh jingeh ïa ki kynhun kiba treikam ha Kashmir. Bun ki kynhun mynta ki la duh nongïalam hadien ba la pynduh noh ïa ki nongïalam ba hakhliehduh jong ki. La pynpra ruh ïa ka kynhun jong ki nongkyrshan ki lehnoh halor ka jingthmu ban pyntroiñ ïa ki kam pyntriem jong ki lehnoh.
