Shillong, Jylliew 01
U nongthaw aiñ barim ka Mawsynram uba dei ruh u nongaiktien ka National People’s Party (NPP), Bah Himalaya M. Shangpliang ha ka Lah Sngi U Blei u la ong ba u kloi ban bteng ban shakri ha ka kyrdan jong ka Jylla bad ban pynleit jingmut ïa ka roi ka par jong ka Mawsynram, wat haba pdiang sngewbha ïa ka jingshah pynrung ha ka thup kyrteng jong ka seng na ka bynta ban ïakhun ïa ka shuki jong ka Rajya Sabha.
“Nga sngew burom haduh katta-katta ba ka kyrteng jong nga ruh ka la paw ha ka thup kyrteng na ka bynta ban ïakhun ïa ka MP Rajya Sabha lem bad ar tylli kiwei pat ki kyrteng, kata jong u James K. Sangma bad Bah Hamletson Dohling,” ong u Bah Shangpliang haba kren sha ki nongthoh khubor.
Da kaba khot ïa ka NPP – kawei na ki seng saiñ pyrthei kaba skhem ha ka nongrim ka synshar paidbah kaba u la shem, u la ai burom ïa ka jingroi jong ka seng naduh u snem 2018 sha “ka jingïalam ba tbit jong u Myntri Rangbah ka Jylla, u Conrad K. Sangma bad ba la synran lang da ki arngut ki Symbud Myntri Rangbah ka Jylla – Bah Prestone Tynsong bad Bah Sniawbhalang Dhar.”
“Ngi la ïohi ba ki la don shibun ki jingkylla kiba kane ka seng bad ka Sorkar ki la wanrah na bynta ka Meghalaya”, u la ong.
U Bah Shangpliang u la kdew ruh ïa ka thup kyrteng jong ki lai ngut ki dkhot kum ka jingpynshisha ïa ka synshar paidbah kaba hapoh jong ka seng.
“Ka jingshisha ka long ba ka jingdon jong 3 ngut ki nongïakhun na ka bynta ka shuki Rajya Sabha da lade hi ka kren shai ïa ka kyrdan jong ka synshar paidbah kaba don ha kane ka seng,” u la ong.
“Uno-uno u lah ban long u kyrtong na ka bynta kum kane ka jait kam hynrei ha kaba khatduh, ka don tang kawei ka jaka, kumta, tang uwei u briew u lah ban leit,” u la ong.
U la ong ruh ba ka rai kaba khatduh ka shong ha u National President bad u State President.
“Wat lada ngam leit sha Rajya Sabha ruh nga long uba kloi ban shakri na ka bynta ka seng ha ka kyrdan jong ka Jylla”, la ong u Bah Shangpliang.
“Ngi don shibun kiei-kiei ban leh na ka bynta ki paidbah ka Jylla. Ngin shakri ïa ki paidbah; ngin pyrshang ban ïarap ïa ki paidbah bad ban wanrah shuh-shuh ïa ka roi ka par sha ki paidbah ka Jylla,” u la ong.
Halor ki mat kiba hakhmat eh jong u, u la bynrap, “Ngin ïatreilang ryngkat bad u National President, lem bad u State President bad pyrshang ïarap ïa ka Sorkar ha ka ban wanrah shuh-shuh ïa ka roi ka par na ka bynta ki paidbah nongkyndong khamtam na ka bynta ki paidbah ka Mawsynram konstitwensi, ha kaba ka dang donkam shuh ïa shibun ka roi ka par.”
“Ngi donkam ban leh shibun ki kam na ka bynta ki paidbah ka konstitwensi bad jong ka Jylla hi baroh kawei. Kumta, ngi don ha ka jingshakri jong ka seng,” u la ong.
