Shillong, Jylliew 02
Ka kynhun ñiah thuk-thuk kaba la tip kum ka The Ultimate Legend Bike Association (TULBA) Mylliem Unit, ka la lah ban pynurlong ïa kawei ka kam, da kaba aiti ïa ka ïing ba thymmai sha ka Kong Lashaihun Kurkalang, na Mawkhan Upper Shillong, kaba la mad ïa ka jingeh bad ka jingkyrduh ha ka longïing, naduh ba u kurim jong ka u la khlad noh.
Kane ka sienjam ba la shim da ka kynhun TULBA, ka long ban don ka mynsiem synei bad ka jingieid para briew.
Kane ka dei ruh ka sien kaba nyngkong eh ïa ka TULBA Mylliem Unit, ban shim bynta ha kum kane ka kam isynei, da kaba pynshna ïing ïa kiba im hapdeng ka jingduk, ka jingeh bad ka jingbym don jingkyrmen.
Ka jingïaid lynti ban tei ïa kane ka ïing, kam shym la long kaba suk, hynrei ka la long ka sakhi ba ka jingieid bad ka jingïatreilang ki paidbah, ka lah ban pynkylla ïa ka jingim jong ki briew.
Ha shuwa ban aiti ïa ka ïing, la pynlong ïa ka jingpynkyntang da u Pastor E. Nongsbap, uba la kyrpad bad duwai kyrpang ba ka ïing kaba thymmai, kan long ka jaka jong ka jingsuk, ka jingkmen bad ka jingkhyrkhu U Blei.
U la kyrpad ruh ba U Blei un ïai btin lynti ïa kane ka kynhun ba kan dang lah ban bteng ban leh ïa ki kam isynei sha kiwei pat, kiba dang mad ïa kajuh ka jingeh ha ka jingim jong ki.
Ha kane ka sngi ba kyrpang, la sakhi lang da kiba bun ki riew rangbah bad ki dkhot nongkitkam jong ka TULBA, kynthup ïa u President ka TULBA sengkmie, u Bah Odicious Shulai, President ka TULBA Mylliem Unit, u Bah Bakordor Nongkhlaw, Rangbah Shnong, u Bah M Kharsati, lem bad kiwei-kiwei ki dkhot ha ryngkat bad kiba ha ïing hasem jong ka Kong Lashaihun.
Ym tang ba ka kynhun ka la noh synñiang da ka ïing, hynrei ka la ai ruh ïa ki jingdonkam ha ïing ha sem, naduh ki khiew shet, ki khiew tiew, ki marbam mardih bad bun kiwei pat ki tiar, kiba donkam ha ka jingim man ka sngi, ban pynsuk ïa ka jingïaid lynti jong kane ka longïing.
Haba kren ha kane ka jingïalang, u President ka TULBA Myllien Unit u Bah Bakordor Nongkhlaw, da ka jingsngewkmen bad jingsngewnguh, u la ong ba ha kaba sdang ban tei ïa kane ka ïing, ka kynhun kam shym la don pisa than, hynrei tang kumba 20 hajar tyngka.
Hynrei, u la ong ba dei lyngba ka jingïarap U Blei bad ka jingïatrei lang ki paidbah, ba ki jingïarap ki la wan na kylleng ki jaka bad na kiba bun ki briew kiba sngewlem, haduh ba ki la lah ban pyndep pura ïa kane ka ïing bad ban aiti noh sha ka Kong Lashaihun.
Ka jingleh jong kane ka kynhun, ka long ka nuksa kaba shai ba wat lada ka jingdon jingem ka rit, hynrei lada don ka dohnud kaba sngewsynei bad ka jingïatylli, lah ban pynmih ïa ki kam kiba khraw bad kiba ktah ïa ka jingim jong kiwei.
