Shillong, Jylliew 02
Ka Hynñiewtrep Youth Development Council (HYDC) ka la dawa ïa u Myntri Rangbah ka Jylla, Conrad K Sangma, ban wanrah ïa ka Meghalaya Employment Policy bad ban pyrkhing ïa ka jingpyntreikam ïa ka MIIP-2024, da kaba kdew ïa ka jingduna ka jingïohkam ki samla trai Jylla bad ka jingpynkheiñ ïa ka aiñ Labour.
Da kaba kdew ba ka bynta kaba khraw jong ki lad ïohkam ka wan na ki bynta jong ki kam shakri (Service Sector), ka HYDC ka la ong, ba ka polisi, kadei ban kyntiew ki lad ïohkam ha ki tnad Industries, Tourism, Healthcare, Education, Retail, Hospitality, Transport bad kiwei ki tnad treikam.
Haba ïadei bad ka MIIP-2024, ka HYDC ka la pynpaw ïa ka jingduna jong ki lad ïoh kam, kiba lah ban ïoh da ki samla trai Jylla ha ki karkhana bad ka la dawa ban leh ‘Audit’ ha baroh ki District, da kaba ban jur ïa ka jingdonkam ban don ka jingïaid beit ïaid ryntih katkum ki kyndon ai kam ïa ki trai Jylla bad ka jingpynmih ïa ki jingkheiñ jingdiah jong ka jingdon ki nongtrei trai Jylla bad nongtrei bar Jylla ha ki karkhana.
Ka HYDC ka la pynpaw ïa ka jingsngewkhia halor ka jingsiew, da kaba ong ba ki nongtrei kiba trei ha ki katto katne ki Petrol Pump, ki la ïathuh ba ki ïoh ïa ka jingsiew kaba kumba T.7,000 shibnai, kaba long kaba duna bha katkum ka Minimum Wage Rates.
Ka la dawa ban pyntreikam ïa ka Minimum Wage Rates bad ban dawa ka lad ïa ki nongtrei, ban pynsngew ïa la ki jingeh ba ki kynduh ha ki jaka trei.
Haba kdew ïa ki jinglap jong ka RTI haba ïadei bad ki dukan ha MUDA, ka HYDC ka la ong “Ki jingbym ïahap ki paw ba ki don hapdeng ki kyrteng jong ki nongïoh dukan ba dei trai Jylla, hynrei kiba shong dukan pat kim dei ki trai Jylla. Donkam ban leh ‘Audit’ ha baroh kawei ka Jylla ba don ki jaka khaïi jong ka MUDA”.
“Ka roi ka par ka dei ban thaw kam thaw jam, ki lad kamai, bad jingmyntoi ha ka ïoh ka kot na ka bynta ki paidbah ka Meghalaya” la ong ka HYDC da kaba bynrap ba ki marpoh khyndew jong ka Jylla ha kaba kut kidei ban pynkylla sha ka kam, ka jingseng kam seng jam, ka jingsiew kaba hok, bad ka jingpynbha ïa ka jingim jong ki samla trai Jylla.
